Ǵylymdy kommertsııalandyrýda qandaı jetistik bar

ASTANA. KAZINFORM — Ǵylymdy kommertsııalandyrý aıasynda 27 joba boıynsha ónimder shetelge satylyp jatyr. Bul týraly Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti málim etti. 

— Qazirgi kezde Ǵylym qory tarapynan 412 jobaǵa qarjylyq qoldaý kórsetildi, onyń 268-i iske asyrý satysynda. Jobalar boıynsha kórsetkishter granttyq baǵdarlamanyń tıimdiligin kórsetti. Qazir 27 joba boıynsha óz ónimderin shetelge satyp jatyr, al 6 joba 1 mlrd teńgeden asatyn saýda kólemine qol jetkizdi, — delingen vedomstvonyń Kazinform agenttigine bergen jaýabynda.

Jobalardyń ǵylymı-tehnıkalyq damýǵa qosqan jalpy úlesi 126 mlrd teńge boldy. Bul soma tórt negizgi quramdas bólikten turady:

1) 53,7 mlrd teńge satylym kólemi;

2) 24 mlrd teńge tartylǵan jeke qosalqy qarjylandyrý kólemi;

3) 11,5 mlrd teńge bıýdjetke tólengen salyq kólemi;

4) 36,7 mlrd teńge ǵylymı qural-jabdyqtarǵa jaratylǵan ınvestıtsııa kólemi.

— Bul jetistik ǵylymdy kommertsııalandyrýǵa salynǵan ınvestıtsııalardyń tek tehnologııalyq damýǵa ǵana emes, sonymen birge el úshin aıtarlyqtaı ekonomıkalyq tabys ákeletinin rastaıdy, — dep naqtylady mınıstrlik.

Aıta keteıik, Ǵylym qory 2016 jyldan bastap ǵylymı nemese ǵylymı-tehnıkalyq qyzmet nátıjelerin (ǴǴTQN) kommertsııalandyrý jobalaryn grant aıasynda qarjylandyrýǵa konkýrstar ótkizip keledi.