Ǵylym mınıstrligi stýdentter shákirtaqysynyń keshigý sebebin túsindirdi

Ǵylym jáne joǵary bilim mınıstrligi stýdentter shákirtaqysynyń keshigý sebebin túsindirdi, dep habarlaıdy QazAqparat tilshisi.

«Bul másele Ǵylym jáne joǵary bilim mınıstriniń baqylaýynda tur. Jańa baǵdarlamaǵa kóshýge baılanysty shákirtaqy tóleý merzimi 2-3 kúnge shegerildi. Keshe shamamen 5 joǵary oqý ornynyń stýdentteri shákirtaqylaryn aldy. Búgin keshke deıin barlyq stýdent shákirtaqylaryn tolyq kólemde alatyn bolady. Ary ketse erteń túsedi. Mınıstr baqylaýda ustap otyr. Shákirtaqy eki kúnge keshikti», - dep málim etti mınıstrliktiń baspasóz qyzmetinen.

Keshe baspasóz betinde elordadaǵy joǵary oqý oryndarynyń stýdentterine stıpendııa keshiktirilip jatqany jazylǵan edi. Mundaı aqparat messendjerlerdegi stýdenttik toptarda taraǵan.

Aıta keteıik, 2021 jyldan beri shákirtaqy stýdenttiń esepshotyna tikeleı túsedi. ıAǵnı, shákirtaqyny JOO emes, Ǵylym jáne joǵary bilim mınıstrligi jiberedi.