Ǵylym mınıstri 1-kýrs stýdentterine úsh keńes berdi
ASTANA. KAZINFORM — Ǵylym jáne joǵary bilim mınıstri Saıasat Nurbek 1-shi kýrs stýdentterine úsh keńesin berdi.
«Birinshisi — oqý protsesi. Sony aıaqqa turǵyzyp alyńyz. Osy qateni kóp adam jasaıdy, men de jasadym — jańa qalaǵa kelip joǵalyp kettik. Birinshi jyl óte mańyzdy. Oqý protsesin áý bastan durys jolǵa qoımasańyzdar, odan keıin qordalanyp qalady, ekinshi, úshinshi semestrde qıyn bolady», — deıdi mınıstr.
Saıasat Nurbek aıtqan ekinshi keńes — aqparatpen jumys isteý daǵdysyn qalyptastyrý.
«Qazir aqparat óte kóp. Kez kelgen dáristen shyqqan soń, birneshe slaıd, birneshe kitap pen silteme bolady. Ony júıege keltiretin óz tártibińiz bolýy kerek. Sondyqtan tsıfrlyq tártip nemese tsıfrlyq qaýipsizdik óte mańyzdy. Úshinshi keńes — densaýlyq. Tamaǵyńyzdy, kúndik tártibińizdi, densaýlyǵyńyzdy, sý men tamaq sapasyn muqııat qarańyz. Sizdiń densaýlyǵyńyz — tek qana sizdiń jaýapkershiligińiz», — deıdi Ǵylym mınıstri.
Aıta keteıik, 2024-2025 oqý jylynda grant sany 94 myńnan asty.
Onyń ishinde 78 myń grant — bakalavrıat stýdentterine, 13 myń grant — magıstratýraǵa berilse, 3 myń grant bolashaq doktoranttarǵa qarastyrylǵan.
