Gıdrotehnıkalyq nysandar senimgerlik basqarýǵa beriledi – Ulttyq quryltaı

QYZYLORDA. KAZINFORM – Memleket basshysy Qasym-Jomart Toqaev V Ulttyq quryltaıda Úkimet pen «Samuryq-Qazyna» qoryna gıdrotehnıkalyq obektilerdi senimgerlik basqarýǵa berý máselesin sheshýdi tapsyrdy.

Qasym-Jomart Toqaev bul qadam iri sý nysandarynyń tıimdiligin arttyrý úshin jasalatynyn basa aıtty.

- Úkimet pen «Samuryq-Qazyna» qory gıdrotehnıkalyq obektilerdiń tıimdiligin arttyrý úshin olardy senimgerlik basqarýǵa berý týraly máseleni sheshý kerek. Kólik-logıstıkalyq keshen de ózine muqııat nazar aýdarýdy talap etedi. Bul sala damymaı ekonomıkanyń turaqty ósýi múmkin emes. Qazaqstannyń tranzıttik áleýeti orasan. Biraq ony tolyq ashý úshin kóp jumys isteý kerek, - dedi Memleket basshysy.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalap jatyr.