Geıts JI arqasynda eńbek naryǵynda tóńkeris bolatynyn málimdedi

ASTANA. KAZINFORM –  Maıkrosoft kompanııasynyń teńqurýshysy Bıll Geıts jahandyq densaýlyq saqtaý men bilim berý salalaryna erekshe kóńil bóletin qaıratker retinde tanymal. Ol jasandy ıntellektiniń (JI) qarqyndy damýy jaqyn bolashaqta ondaǵan jyl boıy damyǵan jáne damýshy elder úshin ózekti bolyp kelgen kadr tapshylyǵy máselesin sheshýge septigin tıgizýi múmkin ekenin málimdedi. Bul týraly Kazinform agenttiginiń tilshisi habarlady. 

Mıllıarderdiń aıtýynsha, jasandy ıntellekt (JI) tipti AQSh sııaqty damyǵan elderde de kezdesetin dárigerler men muǵalimderdiń  tapshylyǵyn joıýǵa qabiletti. Amerıkalyq medıtsınalyq kolledjder qaýymdastyǵynyń málimetinshe, 2036 jylǵa qaraı AQSh-ta 86 myńǵa deıin dáriger men maman jetispeýi múmkin.

Bul qıyndyqtardy eńserý jáne densaýlyq saqtaý salasyndaǵy kásibı kúızelisti azaıtý maqsatynda jasandy ıntellektini qoldanatyn startaptar — mysaly, Suki, Zephyr AI jáne Tennr belsendi damyp keledi. Bul kompanııalar shot jazýdan bastap medıtsınalyq jazbalardy júrgizýge deıingi kúndelikti mindetterdi avtomattandyrýdy, sondaı-aq dıagnoz qoıý dáldigin arttyryp, jańa em túrlerine laıyqty patsıentterdi anyqtaýdy usynyp, mıllıardtaǵan dollar ınvestıtsııa tartqan. McKinsey konsaltıngtik kompanııasynyń baǵalaýynsha, generatıvti JI-di engizý densaýlyq saqtaý jáne farmatsevtıka salalarynda ónimdilikti 370 mıllıard dollarǵa deıin arttyra alady.

Kadr tapshylyǵy bilim berý salasynda da ótkir baıqalady. AQSh-tyń 2023 jylǵy federaldyq statıstıkasyna sáıkes, memlekettik mektepterdiń 86%-y 2023–2024 oqý jylyna muǵalim tabýda qıyndyq kórgen, al 45%-y qyzmetkerlerdiń jetispeýshiligin moıyndaǵan.

Nvidia sekildi tehnologııalyq alpaýyttar qoımadaǵy tapsyrystardy jınaýdan bastap ǵımarattardy tazalaýǵa deıingi fızıkalyq jumystardy oryndaıtyn gýmanoıdty robottar jasaýǵa belsendi ınvestıtsııa quıyp jatyr. Bul jobalar eńbek shyǵyndaryn azaıtyp, tıimdilikti arttyrýdy kózdeıdi.

Geıts bul ózgerister eńbek uǵymynyń ózin túbegeıli ózgertýi múmkin ekenin aıtady.

— Siz zeınetke erterek shyǵa alasyz, aptasyna az saǵat jumys isteýge múmkindik týady. Bul ómirimizdi qalaı ótkizýimiz kerek degen suraqty fılosofııalyq turǵyda qaıta qaraýdy talap etedi, — dedi ol People by WTF podkastynda.

Kásipker mundaı transformatsııany elestetý ózine de qıyn ekenin moıyndady.

— Men úshin oıymdy ózgertý qıynǵa soǵady, óıtkeni men derlik 70 jyl tapshylyq áleminde ómir súrdim, — dep Djon Meınard Keınstiń boljamyna silteme jasady.

1930 jyly Keıns tehnologııalyq progress jumys aptasyn 15 saǵatqa deıin qysqartady dep boljaǵan. Arada bir ǵasyr ótse de, ónimdilik artqanyna qaramastan, kópshilik áli kúnge deıin aptasyna shamamen 40 saǵat jumys isteıdi.

Geıtstiń aıtýynsha, erikti túrde eńbek etý — ol úshin jaı teorııa emes, shyndyq.

— Maǵan jumys isteý qajet emes. Men jumys isteýdi tańdaımyn. Nege? Óıtkeni bul qyzyq, — dedi mıllıarder.

Onyń pikirinshe, jasandy ıntellekt mamandar tapshy elderge — mysaly, Úndistan men Afrıka memleketterine joǵary deńgeıdegi «medıtsınalyq ıntellektini» usyna alady.

Sonymen qatar, Geıts JI men robototehnıkanyń yqpaly medıtsına men bilim berý salasymen ǵana shektelmeıdi dep sanaıdy.

— Jumysshylardy aýystyrý úshin robottardyń óte epti bolýy qajet. Biraq biz soǵan jetemiz, — dedi ol.

Buǵan deıin jasandy ıntellekt bedeýlikpen kúresýge kómektesetini týraly jazǵan edik.