Germanııanyń soltústiginde alǵash ret bornavırýsy tirkeldi
ASTANA. KAZINFORM — Borna aýrýyn juqtyrǵan adam Germanııanyń Meklenbýrg — Aldyńǵy Pomeranııa federaldyq jerindegi Lıýdvıgslýst-Parhım aýdanynda turady, dep habarlaıdy DW.
Atalǵan aýdanda mundaı jaǵdaı alǵash ret tirkelip otyr. Naýqastyń jaǵdaıy týraly naqty aqparat jarııalanǵan joq. Tek onyń tiri ekeni habarlandy.
Borna aýrýynyń vırýsy mıdyń aýyr qabynýyn týdyrady jáne kóp jaǵdaıda ólimge ákeledi. Bul aýrýdy jylqy, sıyr jáne qoı sekildi aýyl sharýashylyǵy janýarlary juqtyrýy múmkin. Adamdarǵa vırýs, boljam boıynsha, jerteserlerden beriledi.
Mysaly, osy janýarlar mekendeıtin qoralar men qambalardy tazalaý kezinde juǵýy yqtımal.
Germanııada jyl saıyn bornavırýsyn juqtyrýdyń 5–10 jaǵdaıy tirkeledi. Kóbine mundaı jaǵdaılar eldiń ońtústigindegi Bavarııa jerinde kezdesedi. Merkur basylymynyń jazýynsha, sońǵy aılarda bul aýrýdan eki adam kóz jumǵan.
Buǵan deıin Germanııanyń soltústiginde bornavırýsynyń jekelegen jaǵdaılary Brandenbýrg jáne Tómengi Saksonııa aımaqtarynda tirkelgen. Alaıda Meklenbýrg — Aldyńǵy Pomeranııa men Shlezvıg-Golshteın jerlerinde mundaı jaǵdaı buryn-sońdy bolmaǵan.
Buǵan deıin Ýgandada Ebola bezgegin juqtyrýdyń jańa jaǵdaılary anyqtalǵany habarlanǵan bolatyn.
