Germanııada jasy 100-den asqan adamdardyń sany artty

ASTANA. KAZINFORM — 2024 jyly Germanııada jasy 100-den asqan 17 900 adam turǵan. Bul kórsetkish 2011 jylmen salystyrǵanda shamamen 25%-ǵa kóp, dep habarlaıdy DW.

Mundaı jasqa jetetinder arasynda áıelder basym, sebebi Germanııada áıelderdiń ortasha ómir súrý uzaqtyǵy 83,2 jyl, bul erlerge qaraǵanda shamamen bes jylǵa uzaq.

Eń kóp uzaq ómir súretinder — Gambýrg qalasynda, al ortasha deńgeıden joǵary kórsetkish Saar jáne Saksonııa jerlerinde baıqalady.

Eń az júz jastan asqandar — Bavarııa, Bremen jáne Brandenbýrg aımaqtarynda.

Germanııada uzaq ómir súretin adamdar sanynyń artýyna birneshe sebep bar:

• ómir súrý jaǵdaıynyń jaqsarýy,

• halyqtyń ál-aýqatynyń artýy,

• medıtsınanyń damýy.

— Alaıda, adam ómiriniń tabıǵı shegi — 120 jas, jáne adam aǵzasy budan uzaq ómir súrýge qabiletti emes, — dep atap ótti Maks Plank qoǵamynyń Keln qalasyndaǵy Qartaıý bıologııasy ınstıtýtynyń mamandary.

Degenmen, keıde erekshe jaǵdaılar bolady. Álemdegi eń kári adam — frantsýz áıeli Janna Lýıza Kalman, ol 1997 jyly 122 jas 5 aıynda qaıtys bolǵan.

Osydan buryn Túrkııanyń eń qart áıelderiniń biri 127 jasynda ómirden ótkenin jazǵan edik.