Germanııada zeınet jasy ulǵaıtylýy múmkin

ASTANA. KAZINFORM — Qazirgi tańda Germanııada zeınetkerlik jasty 65-ten 67 jasqa deıin kezeń-kezeńimen ulǵaıtý úderisi júrip jatyr. Bul úderis onjyldyqtyń sońyna deıin aıaqtalýy tıis. Sonymen qatar, eger eńbek ótili keminde 35 jyl bolsa, azamattar 63 jastan bastap zeınetke shyǵa alady, dep jazdy DW.

Bılik koalıtsııasynyń quramyna kiretin Hrıstıan-demokratııalyq odaq (HDS) partııasy janyndaǵy Ekonomıkalyq keńes zeınetkerlik jasty odan ári ulǵaıtýǵa shaqyrdy. Keńestiń bas hatshysy Volfgang Shtaıger bul turǵyda Shvetsııa, Danııa jáne Nıderland elderiniń tájirıbesin úlgi etý qajet ekenin aıtty.

Onyń aıtýynsha, «zeınetkerlik jasty 67 jastan joǵary deńgeıge deıin júıeli túrde kóterý, zeınetaqy rezervterin jınaqtaý jáne zeınetkerler býynyn halyqtyń qartaıýymen baılanysty máselelerdi sheshýge tartý — atalǵan elderde turaqty zeınetaqy júıesin qalyptastyrýdyń negizgi tetikteri bolyp tabylady».

Germanııanyń jańa úkimeti úshin zeınetaqy saıasatynyń jańa tujyrymdamasyn ázirleý — basty maqsattardyń biri. Koalıtsııalyq kelisimde zeınetaqy mólsherin burynǵy jalaqynyń 48 paıyzy deńgeıinde saqtaý jáne 63 jastan bastap zeınetke shyǵý kepildigi qarastyrylǵan. Alaıda synshylar bul sharalar zeınetaqy saqtandyrý júıesine túsetin júktemeni arttyrýy múmkin dep boljaıdy. 

Al Qytaı úkimeti zeınet jasyn 63 jasqa deıin uzartatynyn málimdegen edi.