Germanııada saqtandyrý aıasynda aıaq-qolǵa lıposaktsııa jasatýǵa bolady
ASTANA. KAZINFORM – Lıposaktsııa endi elde maıly tinderdiń birkelki bólinbeýimen sıpattalatyn lıpedemadan zardap shegetinder úshin mindetti medıtsınalyq saqtandyrýdyń standartty qyzmeti, dep habarlaıdy DW aqparat agenttigi.
Bul sheshimdi densaýlyq saqtaý jónindegi konsýltatıvtik keńes (G-BA) qabyldady. Germanııada mundaı 4 mıllıonǵa jýyq patsıent bar, olardyń kópshiligi áıelder.
2026 jyldyń 1 qańtarynan bastap olardyń barlyǵy dertiniń aýyrlyǵyna qaramastan saqtandyrý aıasynda qoldary men aıaqtaryna lıposaktsııa jasata alady. G-BA tapsyrysy boıynsha júrgizilgen zertteý bul jaǵdaıda hırýrgııalyq aralasý konservatıvti ádisterge qaraǵanda tıimdirek ekenin dáleldedi.
Lıpedemadan zardap shegetin adamdar kúshpen basý kezinde aýyrsynýdy, sonymen qatar aıaq-qoldarynda aýyrlyqty sezinedi. Alaıda dárigerlerdiń aıtýynsha, adamdar dene bitimi ózgerýine baılanysty ushyraıtyn kúızelis te mańyzdy.
Osy arada eskertý de bar: otany tek alty aı boıy júıeli túrde oryndalatyn komprester men emdik jattyǵýlar sııaqty dástúrli ádister esh nátıje bermese ǵana taǵaıyndaýǵa bolady.
Buǵan deıin Qazaqstanda kimderge plastıkalyq ota tegin jasalatyny týraly jazǵan bolatynbyz.