Germanııada baılyqqa salynatyn salyq 140 mlrd eýrodan asa tabys ákelýi múmkin

ASTANA. KAZINFORM — Germanııanyń Solshyl partııasy baılyqqa salynatyn salyqty qaıta engizýdi usynyp otyr. Olardyń esepteýinshe, bul salyq jylyna 147 mıllıard eýrodan astam tabys ákelýi yqtımal, dep habarlaıdy AZERTADJ.

Tagesschau málim etkendeı, Solshyl partııa baılyqqa salynatyn salyqty qaıta jandandyrýdy uzaq ýaqyttan beri kóterip keledi. Bul salyqtyń qoldanylýy 1997 jyly toqtatylǵan bolatyn.

Endi partııa Germanııanyń Ekonomıkalyq zertteýler ınstıtýtyna (DIW) bul bastamanyń memlekettik bıýdjetke qansha qarajat ákelýi múmkin ekenin esepteýdi tapsyrǵan. Nátıjesinde, boljamdy tabys kólemi jylyna shamamen 147,4 mlrd eýrony quraýy múmkin.

Solshyl partııanyń esebinshe, bul qarajattyń esebinen, mysaly, Bavarııa jerinde jetispeı turǵan 470 myń páterdiń qurylysyn qarjylandyrýǵa, al Tıýrıngııada balabaqsha qyzmetin tegin etýge bolar edi.

Partııa usynǵan modelge sáıkes, jeke tulǵalardyń 1 mıllıon eýroǵa deıingi, al kásiporyndardyń 5 mıllıon eýroǵa deıingi aktıvteri baılyq salyǵynan bosatylady. Osy mejeden asatyn aktıvterge 1 paıyzdyq salyq salynady. Al aktıvter kólemi 50 mıllıon eýrodan assa — 5 paıyz, 1 mıllıard eýrodan assa — 12 paıyz mólsherleme qoldanylady.

Budan buryn Germanııada óz kúnkórisin qamtamasyz etýde qıyndyq kórip, kedeılik qaýpine ushyraǵan adamdar sany artyp kele jatqanyn jazǵanbyz.

Sonymen qatar Germanııada dárigerge jazylý úshin ortasha kútý ýaqyty 42 kúnge jetkeni belgili boldy.