Germanııada áskerge barǵysy keletinder sany artyp keledi

ASTANA. KAZINFORM — 2026 jyldyń aqpan aıynyń sońyna qaraı Germanııada 16 100 er adam men áıel Býndesver qataryna qosylýǵa ótinish bergen. Bul kórsetkish 2025 jylmen salystyrǵanda 20%-ǵa joǵary, dep habarlaıdy DW.

Ásirese 6–11 aılyq erikti áskerı qyzmet pen 12–23 aıǵa arnalǵan qysqa merzimdi qyzmetke qyzyǵýshylyq aıtarlyqtaı artqan. Germanııa Qorǵanys mınıstrliginiń málimetinshe, mundaı sarbazdar sany bir jyl ishinde 15%-ǵa ósip, 13 400 adamǵa jetken.

2026 jyldan bastap elde áskerı qyzmetti retteıtin jańa zań kúshine endi. Oǵan sáıkes, 18 jastan asqan barlyq azamattarǵa medıtsınalyq tekserýden ótý týraly hat joldanady. Bul olardyń áskerı qyzmetke jaramdylyǵyn anyqtaý úshin qajet.

Qazirgi tańda Býndesverde 186 200 sarbaz qyzmet etedi, bul 2025 jyldyń aqpanymen salystyrǵanda 3600 adamǵa kóp. Basqa elderden tóngen qaýip aıasynda Germanııa úkimeti 2030 jyldardyń ortasyna qaraı ásker sanyn 260 myńǵa deıin jetkizýdi josparlap otyr. Sondaı-aq rezervtegi ásker sanyn 200 myńǵa deıin arttyrý kózdelgen.

Buǵan deıin habarlaǵanymyzdaı, shved zertteý ınstıtýty SIPRI málimetinshe, Germanııa álemde qarý-jaraq eksporttaýshylar arasynda tórtinshi orynda tur.