Germanııa vıza berýden bas tartýǵa shaǵymdaný tártibin joıady
BERLIN. KAZINFORM — 2025 jylǵy 1 shildeden bastap Germanııa vıza berýden bas tartý týraly sheshimge qarsy apellıatsııa (remonstratsııa) rásimin álem boıynsha resmı túrde toqtatady. Bul týraly Kazinform agenttiginiń menshikti tilshisi habarlady.
Remonstratsııa — bul vıza berýden bas tartý týraly habarlama alǵannan keıin bir aı ishinde sol sheshimge shaǵymdanýǵa múmkindik beretin protsedýra.
Germanııa Syrtqy ister mınıstrliginiń málimetinshe, remonstratsııa protsesiniń kúshin joıý búkil álem boıynsha vıza berý protsesin jedeldetýge kómektesedi. Bul sheshim vızalarǵa ótinish sanynyń artýyn eskere otyryp qabyldanǵan. Úkimet 2023 jylǵy maýsymda iske qosylǵan pılottyq jobanyń oń nátıjelerin atap ótti. Sol kezeńde Germanııanyń sheteldegi ókildikteri shengendik jáne ulttyq vızalar boıynsha remonstratsııa protsesin toqtatqan bolatyn.
Nátıjesinde ótinishterdi óńdeý sany edáýir artty, al kútý ýaqyty qysqardy. Ákimshilik shaǵymdardy qaraýmen aınalysatyn personaldy vıza ótinishterin tikeleı qaraý protsesine tartý arqyly Germanııa ótinishterdi óńdeýdegi kidiristerdi azaıtýǵa jáne vızalardyń ýaqytyly berilýine qol jetkizgisi keledi.
Remonstratsııa protsedýrasy vızadan bas tartylǵan tulǵalarǵa sheshimdi qaıta qaraýdy surap, qosymsha qujattar men túsiniktemelerdi usynýǵa múmkindik beretin. Bul mindetti emes bolatyn, biraq ótinish berýshiler úshin óz isin qorǵaýdyń bir joly sanalatyn. Alaıda endi ony joıý — ákimshilik rásimderdi ońtaılandyrýǵa, ótinishterdi qaraý merzimin qysqartýǵa jáne protsesti jedel ári tıimdi etýge baǵyttalǵan qadam retinde qarastyrylyp otyr.
Soǵan qaramastan, Germanııanyń Syrtqy ister mınıstrligi ótinish ıeleriniń zańdy quqyqtary ózgerissiz qalatynyn atap ótti:
— Vızadan bas tartylǵan kez kelgen adam eshqandaı shekteýsiz jańa ótinish bere alady. Sonymen qatar, ótinish berýshiler sot arqyly sheshimge shaǵymdaný quqyǵyn saqtap qalady, bul — narazylyq rásimi bolmasa da, olardyń zańdy qorǵanysyn qamtamasyz etedi, — delingen mınıstrliktiń málimdemesinde.
Remonstratsııa rásiminiń joıylýyna baılanysty Germanııa belgili bir vızalyq sanattar boıynsha onlaın ótinish berý júıesin keńeıtip jatyr.
2025 jylǵy qańtardan bastap ulttyq vızalarǵa ótinish berýshiler — sonyń ishinde bilikti mamandar, stýdentter, shákirtter jáne otbasymen qaıta qosylýǵa nıetti adamdar — óz ótinishterin konsýldyq qyzmetter portaly arqyly onlaın túrde tapsyra alady. Bul júıe ótinish berýshilerge qujattardy tsıfrlyq formatta durys jáne tolyq túrde usyný úshin kezeń-kezeńmen nusqaýlyq beredi.
Germanııanyń sheteldegi ókildikteri vızaǵa ótinish berý protsesteriniń tsıfrlanýy tolyq emes ótinishterdiń kóp bolýyna baılanysty týyndaıtyn kidiristerdi qysqartýǵa kómekteskenin atap ótti. Bul sandyq formatqa kóshý, ásirese, vızaǵa suranysy joǵary elderdiń — Úndistan, Qytaı jáne AQSh azamattary úshin asa mańyzdy bolmaq.
EO men Qazaqstan arasynda vızalyq rejımdi jeńildetý boıynsha kelissózderdiń barysy týraly aqparatty arnaıy siltemeden oqýǵa bolady.