Germanııa tórtkúndik jumys aptasyn synaqtan ótkizýde

BERLIN. QazAqparat – Qyrkúıekten bastap nemis kompanııalary eksperımentke qatysýǵa ótinim bere alady: onyń 50-den astamy tańdap alynyp, tórtkúndik jumys aptasyna kóshýge qatysty keńes beriledi. Olar mundaı rejımde 2024 jyldyń aqpanynan bastap jarty jyl jumys isteıdi. Qyzmetkerlerdiń jalaqysy ózgermeıdi, tájirıbege kólemi ártúrli kompanııalar qatysa alady, dep habarlaıdy QazAqparat Deusche Welle basylymyna silteme jasap.

Bul, Germanııadaǵy eń iri eksperıment bolǵaly tur. Munda jumys ýaqytyn qysqartý óte qıyn. Aýstralııa, Islandııa men Ulybrıtanııa osyndaı úlgini synaqtan ótkizip jatqanda Germanııanyń birqatar kásipkeri men saıasatkerleri mundaı tásil tıimsiz ekenin, ekonomıkany quldyratatynyn aıtqan bolatyn. Shyn máninde qalaı bolatynyn endi tekserip kórýge múmkindik bar. Intraprenör konsaltıng kompanııasy men Mıýnster ýnıversıtetiniń ǵalymdary testten keıin tájirıbe nátıjelerine baǵa beredi.

Aıta ketsek, Ulybrıtanııada ótkizilgen osyǵan uqsas test tórt kún jumys isteıtinderdiń bes kún isteıtinderge qaraǵanda ómirine kóńili tolatynyn jáne deni saý ekenin kórsetken. Máselen, olar aýyrǵanyna baılanysty demalysty sırek alady. Eksperımentke qatysqan brıtandyq kompanııalardyń tabysy shamamen 1,4 protsentke artqan. Osy úlgini synaqtan ótkizgen 10 kompanııanyń 9-y ary qaraı osy tásildi jalǵastyra berýdi sheshti.