Germanııa Qazaqstanda Sýtegi dıplomatııasy keńsesin ashýdy usyndy
Bul týraly búgin elordada Qazaqstan Premer-Mınıstriniń orynbasary – Syrtqy ister mınıstri Muhtar Tileýberdi aıtty, dep habarlaıdy QazAqparat tilshisi.
«27 qazanda «Svevind» nemis-shved kontserniniń «HYRASIA ONE» enshiles kompanııasy men Qazaqstan Úkimeti arasynda ınvestıtsııalyq kelisimge qol qoıyldy. Onyń aıasynda Eýropa men Azııanyń energetıkalyq jáne shıkizat qorlarynyń ónerkásiptik aýqymdy qaýipsizdigin qamtamasyz etý maqsatynda Qazaqstanda taza ári ekologııalyq tıimdi «jasyl» sýtegi shyǵaratyn álemdegi eń iri kásiporyndardyń birin salý josparlanyp otyr», - dedi M. Tileýberdi Germanııanyń Federaldyq Syrtqy ister mınıstri Annalena Berbokpen kezdesýden keıin.
Bul turǵyda Germanııa jaǵy Qazaqstanda Sýtegi dıplomatııasy keńsesin ashýdy usyndy.
«Osy oraıda biz nemis tarapynyń Astanada Sýtegi dıplomatııasy keńsesin ashý usynysyn quptaımyz. Berbok hanym, bul bastamańyz úshin alǵys aıtamyz jáne ony jan-jaqty qoldaýǵa daıynbyz», - dedi Muhtar Tileýberdi.
Budan buryn habardanǵandaı, jaqynda Aqordada Memleket basshysy Qasym-Jomart Toqaev pen Eýropalyq Keńes Prezıdenti Sharl Mıshelge Mańǵystaý oblysynda «jasyl» sýtegin óndirý jáne taratý ortalyǵyn qurý jobasy tanystyryldy.
Investor Svevind Group kompanııasy Mańǵystaý oblysynda qýaty jylyna 2 mıllıon tonna bolatyn «jasyl» sýtegi óndirisin qolǵa alýdy josparlap otyr.
