Germanııa bilikti mıgranttarǵa esigin ashty

BERLIN. QazAqparat - Eýroodaq quramyna kirmeıtin elderdiń azamattaryna Germanııaǵa kóshý ońaıyraq bolady. Býndestag qabyldaǵan 2020 jylǵy kóshi-qon zańyna engizilgen túzetýler jańa joldardy ashady, dep habarlaıdy QazAqparat euronews.com saıtyna silteme jasap.

Germanııa jumys kúshi tapshylyǵy máselesin sheshý úshin bilikti mamandardy tartady. Zań úmitkerdiń kásibı tájirıbesin jáne Kanada sııaqty elderde qoldanylyp júrgen júıelerge uqsas basqa faktorlardy eskeretin «balldyq júıeni» qarastyrady.

Túzetýlerdiń birine sáıkes, elge 2023 jyldyń 29 naýryzyna deıin kelgen baspana izdeýshiler jáne bılik organdarynan jaýap almaǵandar ózderiniń mártebesin baspana izdeýshiden jumys izdep júrgen eńbek mıgrantyna ózgerte alady.

Joǵary bilikti jumysshylarǵa Germanııaǵa kóbirek týystaryn ákelýge ruqsat etiledi.

Mamandardyń aıtýynsha, elge jyl saıyn 400 myńǵa jýyq bilikti mıgrant qajet. Ulttyq eńbek agenttiginiń málimetinshe, ótken jyly 1200-ge jýyq kásiptiń 200-de jumys kúshi tapshy bolǵan.

Vedomstvonyń habarlaýynsha, tizimge avtobýs júrgizýshileri, farmatsevter, sáýletshiler, qyzmet kórsetý men aqparattyq tehnologııalar salasynyń qyzmetkerleri kirgen. Naýqas pen bala kútimine kelgende jumys qoly jetpeıdi.

Germanııanyń Іshki ister mınıstri Nensı Fezer bul zańdy «el bolashaǵy úshin jasalǵan úlken qadam» dep atap, bilikti jumys kúshiniń jetispeýshiligi ekonomıkalyq ósýdiń baıaýlaýynyń sebepteriniń biri ekenine nazar aýdardy.

HDS/HSS fraktsııasy tóraǵasynyń orynbasary Andrea Lındholts zańdy synǵa aldy. Onyń pikirinshe, zańǵa engizilgen túzetýler elge biliktiligi tómen adamdardy tartyp, Germanııaǵa zańsyz kóship kelýge jańa múmkindik týǵyzady.