Gennadıı Golovkın 3 tıtýl úshin aıqasyna deıin keri esep bastady

NUR-SULTAN. QazAqparat – Qazaqstandyq boksshy, IBF jáne IBO nusqalary boıynshaorta salmaqtaǵy álem chempıony Gennadıı Golovkın (41-1-1, 36 KO) japondyq Rıota Mýratamen (16-2, 13 KO) jekpe-jegine deıin keri esep júrgize bastady, dep habarlaıdy QazAqparat.

Orta salmaqtaǵy WBA Super, IBF jáne IBO nusqalary boıynsha chempıondyq tıtýldar úshin jekpe-jek 9 sáýir kúni Japonııanyń Saıtama qalasynda ótedi.

G. Golovkın Instagram-daǵy paraqshasynda jattyǵý barysynan vıdeo jarııalap: «One week to go! Jekpe-jekke bir apta qaldy. Odna nedelıa do boıa», - dep jazdy.

Osy kúnderi qazaqstandyq boksshy komandasymen birge Japonııada júr. Ony jýrnalıster men fanattar áýejaıdan ystyq yqylaspen kútip aldy.

Golovkın jýrnalısterge bergen suhbatynda kelisim R.Mýratamen bolǵandyqtan, ózge qarsylastardy qarastyrmaǵanyn málim etti.

«Japonııadaǵy pandemııa jaǵdaıyna baılanysty jekpe-jek qaı ýaqytqa ysyrylatyny belgisiz edi. Mýratanyń ornyna basqa bireýmen aıqas ótkizýdi josparlaǵan joqsyń ba?» dep surady tilshi Qazaqstan boksshysynan.

«Ol jóninde oılaǵanym joq. Bul aıqas men úshin mańyzdy. Onymen bir mezgilde men Mýratany óte qurmetteımin. Biz osy beldikter úshin jekpe-jek ótkizgimiz keledi. Bir-birimizge degen syılastyq máselesine oralar bolsaq, qol jetkizilgen kelisimdi buzý jóninde oılaǵanymyz da joq», - dep jaýap berdi Gennadıı.

Golovkın-Mýrata aıqasy DAZN platformasyndaǵy álemniń 200-den astam elinde tikeleı kórsetiledi (Japonııa, Ońtústik Koreıa jáne Qazaqstannan basqa). Alaıda, boks keshin Qazaqstannyń qaı telearnasy kórsetetini ázirge belgisiz.

Aıta keteıik, Gennadıı 2020 jyldyń jeltoqsanynan beri rıngke shyqqan joq. Ol kezde polıak Kamıl Sheremetany tehnıkalyq nokaýtpen jeńip, ózine tıesili chempıondyq beldikterdi qorǵap qalǵan bolatyn.