General-maıor Qaırat Kópbaev eki aıǵa úıqamaqqa alyndy

NUR-SULTAN. QazAqparat – Qorǵanys mınıstrliginiń general-maıory Qaırat Kópbaev eki aıǵa úıqamaqqa alyndy. Bul aqparatty Qorǵanys mınıstrligi rastady, dep habarlaıdy QazAqparat.

«Jemqorlyqqa qarsy kelisim aıasynda Sybaılas jemqorlyqqa qarsy is-qımyl agenttigimen birlese júrgizgen sharalardyń arqasynda QR Qorǵanys mınıstrliginiń kadrlar departamentiniń burynǵy bastyǵy – general-maıor Kópbaev ustalyp, qazir oǵan qatysty sotqa deıingi tergeý amaldary júrgizilip jatyr. Qazirgi ýaqytta general-maıor Kópbaevqa qatysty 2 aı merzimge úıqamaqta ustaý bultartpaý sharasy qoldanyldy», - dedi tilshilerge QR Qarýly kúshteri áskerı polıtsııasy bas basqarmasy bastyǵynyń orynbasary Beken Shyntileýov.

Onyń aıtýynsha, BAQ-ta general-maıor Kópbaevtyń kadrlar jáne áskerı bilim departamentin basqaratyny jaıly aqparat tarap ketken.

«Bul málimet durys emes. Laýazymdy qyzmet pen áskerı ataǵyna qaraı onyń laýazymy – QM kadrlar departamentinde bolǵan. Onyń áskerı bilim departamentine qatysy joq», - dedi Beken Shyntileýov.

Qylmystyq zańnamaǵa sáıkes, aıtarlyqtaı shyǵynǵa 50 AEK-ten bastalatyn (130 myń teńge) soma jatady.

Eske salsaq, QR Qorǵanys mınıstrliginiń generaly júıeli túrde para aldy degen kúdikpen ustalǵany týraly habarlaǵan bolatynbyz.