Gazadaǵy soǵys qaıta bastalýy múmkin: Netanıahý men Tramptyń ýltımatýmy

ASTANA. KAZINFORM — Izraıl premer-mınıstri Bınıamın Netanıahý eger HAMAS senbi kúni túske deıin kepilge alynǵandardy qaıtarmasa, Izraıl armııasy Gaza sektoryndaǵy áskerı operatsııalaryn qaıta bastaıtynyn málimdedi, dep habarlaıdy VVS. 

— Eger HAMAS senbi kúni túske keıin kepilge alynǵan bizdiń adamdarymyzdy qaıtarmasa, kelisim aıaqtalady jáne TsAHAL HAMAS talqandalǵansha qarqyndy áskerı áreketterdi qaıta jandandyrady, — dedi Netanıahý áskerı kabınet múshelerimen kezdesýden keıingi málimdemesinde.

Budan basqa, AQSh prezıdenti Donald Tramp HAMAS-tan senbi kúni túske deıin barlyq kepilge alynǵandardy bosatýdy talap etip, áıtpese «naǵyz tozaq bastalatynyn» aıtty.

— HAMAS meniń ne aıtyp turǵanymdy túsinedi, — dedi ol.

Bir kún buryn sodyrlar Izraıl atysty toqtatý kelisiminiń sharttaryn oryndamaı otyr dep málimdep, tutqynda bolǵan ızraıldikterdi bosatýdyń jáne olardy palestınalyq tutqyndarǵa aıyrbastaýdyń kelesi kezeńin toqtatamyz dep qorqytty. 

Izraıl qorǵanys mınıstri Israel Kats HAMAS málimdemesine qatysty pikir bildirdi. 

Eske sala ketsek, ótken senbide soǵysty toqtatý kelisimi aıasynda HAMAS Qyzyl Krest uıymyna kepilge alynǵan úsh adamdy tapsyrdy. 

Osylaısha, HAMAS barlyǵy 16 ızraıldikti bosatty, 17 adam sodyrlardyń qolynda qalyp otyr. Izraıldik derekterge sáıkes, osy 17 adamnyń segizi qaıtys boldy, ıaǵnı Izraıl taǵy toǵyz adamnyń bosatylýyn kútip jatyr.

HAMAS osy senbide taǵy úsh ızraıldikti bosatýy tıis edi. Onyń ornyna Izraıl birqatar palestınalyq tutqyndy bosatpaq boldy.