Gazada 17 myń bala ata-anasyz qaldy - ıÝNISEF
ASTANA. KAZINFORM - Gaza sektorynda 17 000-ǵa jýyq bala baǵýshysynan nemese otbasynan aıyrylǵan. Bul týraly 2 aqpanda Jenevada ótken brıfıngte ıÝNISEF-tiń Palestınamen baılanys jónindegi dırektory Djonatan Krıks málimdedi.
"Ár balanyń júrekti eljiretetin óz oqıǵasy bar", - deıdi ol.
Krıks ótken aptada Gaza sektoryna jasaǵan saparyn eske alyp, otbasylardyń azyq-túlik, sý nemese baspana jetispeıtindikten qıyn jaǵdaıda qalǵanyn atap ótti.
«Otbasylar men balalar negizgi qajettilikterdi qanaǵattandyrý úshin kúresýde», – dedi ol.
Dırektordyń aıtýynsha, Gazadaǵy oqıǵalar balalardyń psıhıkalyq densaýlyǵyna qatty áser etken.
«Jeltoqsan aıynda biz anklavtaǵy 500 myń bala psıhologııalyq kómekke muqtaj dep aıtqan bolatynbyz. Qazir anklavtaǵy balalardyń barlyǵy aýyr háldi bastan keshýde. Bul jaǵdaı balalardyń bomba gúrsilin estigen saıyn qatty qobaljýynan, tábetiniń tómendeýinen, uıqysyzdyqtan, emotsıonaldy kúızelister men dúrbeleńdi sezinýden bolyp otyr», – deıdi Djonatan Krıks.
