Gaza halqy soǵyspen birge ashtyqpen de alysyp jatyr

Gaza sektorynda adamdardyń kúneltýiniń ózi qıyndap ketti. Gýmanıtarlyq kómek blokadasy ashtyqqa ákeldi. Adamdar kúnine bir ret tamaqtansa soǵan qýanady, dep habarlaıdy Kazinform agenttigi Euronews resýrsyna silteme jasap. 

Olar úı-jaıyn aqshasyz jáne eshqandaı zat almaı tez tastap ketýge májbúr bolǵan. Endi azyq qylatyn túgi joq.

Gaza soǵysy saldarynan qonys aýdarǵan palestınalyqtar qorqynysh pen qaýip-qaterden bólek ashtyqpen de alysyp jatyr.

Bul lagerdegi adamdardy kúnine keminde bir márte tamaqtandyrýdyń ózi ońaı bolmaı otyr. 

«Bul otyndy ózime jáne baýyrlaryma bıdaı qaınatý úshin jaǵyp jatyrmyn. Demek búgin ash qalmaımyz. Biz kesheden beri nár tatpadyq», — deıdi ıAmen Labad deıtin qonys aýdarǵan bala.

Lagerdegi otbasylar bul jerde ómir óte qıyn ekenin jáne kóp kúndi tamaqsyz ótkizetinin aıtady.

Qonys aýdarǵan taǵy bir áıel kórshileriniń kómegimen burshaq jáne jeýge jaramdy molohııa shóbinen azyq daıyndap jatyr. 

«Nan alý qıyn, sý tabý odan da qıyn, un joq, kómek joq, balalardyń jaǵdaıy óte aýyr. Tamaqty kúnine bir ret, túski as kezinde alýǵa bolady. Tańǵy as ta, keshki as ta joq. Jaǵdaı osyndaı. Biz bas saýǵalap úıden tez qashyp shyqtyq, soǵys bolady dep kútpedik, sondyqtan qolymyzda eshteńe joq», — deıdi Ýmm Mahmýd ál-Asamna atty áıel. 

Gaza sektoryndaǵy gýmanıtarlyq kómek blokadasy azyqtyń sarqylýyna ákeldi.

Kóbi bomba astyndaǵy jyldam ólimniń ornyna bosqyndar lagerinde baıaý ajal kútip turǵanyn aıtady.