Gaza «balalar beıitine» aınalyp barady – BUU Bas hatshysy

BUU Bas hatshysy Antonıý Gýterrısh Izraıl áýe shabýyldary kúsheıgen saıyn Gaza sektory «balalar beıitine» aınalyp bara jatqanyn eskertti. Kazinform bul týraly BBC jańalyqtaryna silteme jasap habarlaıdy. 

Dúısenbi kúngi sózinde Gýterrısh anklavtaǵy jaǵdaı qazir gýmanıtarlyq daǵdarystan góri, adamzat daǵdarysyna aınalyp bara jatqanyn aıtty.

«Kún saıyn júzdegen qyzdar men uldar qaza tabady nemese jaraqat alady», - dedi BUU Bas hatshysy HAMAS sodyrlary Izraılge shabýyl jasap, Izraıl áskeri keri soqqy bergenine bir aı bolǵanda ótken baspasóz máslıhatynda.

Gýterrısh taǵy da tez arada atysty toqtatýǵa shaqyrdy.

Onyń sózderin Izraıl syrtqy ister mınıstri Elı Koen synǵa alyp, X áleýmettik jelisinde «Uıalmaısyz ba?» dep jazdy.

«Gaza sektorynda 30-dan astam kámeletke tolmaǵan bala bar. Onyń ishinde 9 aılyq náreste, sondaı-aq ata-analarynyń qandy qyrǵynǵa ushyraǵanyn kórgen sábıler men balalar bar. Olar erkinen tys qamaýda otyr», - dedi ol.

Izraıldiń Gaza sektoryna áýe shabýyldary kúsheıdi. Izraıl HAMAS ınfraqurylymyn nysanaǵa alyp, beıbit turǵyndardyń ólimin azaıtyp jatqanyn aıtty.

Benıamın Netanıahý AQSh-tyń ABC News arnasyna soǵys aıaqtalǵannan keıin Izraıl Gaza sektoryndaǵy qaýipsizdikke jalpy jaýapkershilikti óz moınyna alatynyn aıtty.

Izraıl áskeri dúısenbi kúni sońǵy 24 saǵat ishinde HAMAS uıymynyń 450 nysanyn, sonyń ishinde tankke qarsy zymyrandardy ushyrý alańdaryn qıratqanyn habarlady.

HAMAS basqaratyn Gaza Densaýlyq saqtaý mınıstrligi, ızraıldik naýqan bastalǵannan beri bul aýmaqta 10 022 adam, onyń ishinde 4 104 bala qaza tapqanyn habarlady.