Gaz 2070 jylǵa deıin de, odan keıin de qoldanylady — SOCAR prezıdenti
ASTANA. KAZINFORM — Gaz 2070 jylǵa deıin de, odan keıin de qoldanylady. Mundaı pikirdi Kazakhstan Energy Week — 2025 jáne XVI Eýrazııalyq KAZENERGY forýmynda SOCAR prezıdenti Rovshan Nadjaf aıtty.
— Munaı men gaz qajettiligi birneshe ondaǵan jyl boıy saqtalady. Tek gazǵa keler bolsaq, ol keminde 2070 jylǵa deıin jáne odan keıin qoldanylady. Sondyqtan da gaz salasyndaǵy jobalarǵa ınvestıtsııa quıyp jatyrmyz. Osydan 3 jyl buryn Eýropadaǵy seriktesterimiz gaz jetkizý kólemin arttyrý ótindi. Biz eýropalyq seriktesterimiz tarapynan qubyr ınfraqurylymyn keńeıtýge qarjylaı qoldaý bolǵan jaǵdaıda 2 ese ulǵaıtýǵa kelistik. Óıtkeni, qazirgi gaz dáliziniń ınfraqurylymyn Ázerbaıjan seriktesterimen birge qarjylandyryp, atalǵan jobaǵa qatysty táýekelderdi óz moınyna aldy, — dedi ol.
Onyń aıtýynsha, 2022 jylǵa deıin Ázerbaıjan tarapy qoldanystaǵy gaz qubyrlarynyń ınfraqurylymyn keńeıtýi josparlaǵan emes.
— Degenmen, gaz qubyrynyń turaqtylyǵyn saqtaý, mol kólemdi gaz jóneltý úshin Eýropadaǵy seriktestermen uzaqmerzimdi kelisimsharttar men Eýropa odaǵynyń qarjy ınstıtýttary tarapynan qoldaý qajet. Eýropalyqtar 2030, 2035 jyldarǵa deıin gaz kerektigin aıtqanymen kómirtegi jobalaryn qarjylandyrýǵa qulyqty emes. 1 jylǵa ǵana gaz jetkizilimine ınvestıtsııa quıý múmkin emes. Sondyqtan da gaz salasynda uzaqmerzimdi ınvestıtsııa qajet. Eýropalyq seriktester tarapynan yntymaqtastyq bolǵan jaǵdaıda gaz jetkizý kólemin arttyrýǵa daıynbyz. Biraq, birinshi kezekte uzaqmerzimdi kelisimsharttar qamtamasyz etilip, odan soń ınfraqurylymdy keńeıtýge birlesken ınvestıtsııa quıý qajet, — dedi Rovshan Nadjaf.
Forým barysynda «QazMunaıGaz» UK» AQ basqarma tóraǵasy Ashat Hasenov kompanııa úshin asa mańyzdy baǵyttardy ataǵan edi.
Aıta keteıik, forýmǵa Qazaqstan Úkimetiniń múshelerimen qatar, Ortalyq Azııa elderiniń resmı delegatsııalary, halyqaralyq uıymdardyń basshylary, álemdik jáne ulttyq energetıkalyq kompanııalardyń top-menedjerleri, jetekshi sarapshylar men ǵylymı orta ókilderi qatysyp jatyr. KEW-2025 búginde energetıka salasyndaǵy eń ózekti máselelerdi talqylap, jańa sheshimder usynatyn ári óńirlik jáne jahandyq yntymaqtastyqty nyǵaıtýǵa yqpal etetin mańyzdy halyqaralyq alań retinde erekshelenýde. Bıylǵy is-sharaǵa 50-den astam memleketten 2,5 myńnan astam delegat pen 300-den astam iri kompanııanyń ókilderi jınaldy.