Gavaııdegi órt: tarıhı qala órtenip ketti, qurbandar bar
Gavaıı gýbernatory Djosh Grınniń aıtýynsha, 9 myń halqy bar týrıstik jáne tarıhı ortalyq Lahaınanyń kóp bóligi qırap, júzdegen otbasy evakýatsııalandy. AQSh shtatynyń senatory Braıan Shats áleýmettik jelilerde Lahaına «tolyǵymen derlik órtenip ketti» dep málimdedi. Jergilikti turǵyndar júrekti aýyrtatyn kórinister týraly habarlaıdy.
«Bizde endi Lahaına joq. Ol endi joq», - dedi Mark Shtefl CNN tilshisine. Araldyń aýrýhanalary kúıik shalǵan, sondaı-aq tútinnen ýlanǵan naýqastarǵa toly, dep habarlaıdy BBC News.
Maýı aralyndaǵy órttiń kópshiligi ishinara 800 mılden astam qashyqtyqtaǵy Dora daýylynan bolǵan qatty jelden týyndaǵan, ol áli de aýyzdyqtalǵan joq. Daýyl kezinde jel ekpini 97 km/saǵ boldy.
«Órt sóndirýshiler jalynmen áli kúresip jatyr, al bizdiń tótenshe jaǵdaılar qyzmeti izdeý-qutqarý rejıminde jumys isteýde», - dedi Shats.
Sársenbi kúni tańerteń keıbir adamdar tez taralǵan jalynnan qashyp, muhıtqa sekirgeni týraly aqparat taraldy. AQSh Jaǵalaý kúzeti sýdan kem degende on adamdy qutqarǵanyn málimdedi. Maýı okrýginiń meri kishi Rıchard Bıssen baspasóz máslıhatynda kóptegen úı men bıznes qurylymdary tolyǵymen qıraǵanyn aıtty. Sheneýnikter qazir Maýıdegi zalaldyń naqty kólemin anyqtaý qıyn ekenin aıtyp, qaza bolǵandar sany artýy múmkin ekenin eskertti. Órt saldarynan myńdaǵan adam elektr qýatynsyz jáne uıaly baılanyssyz qalady.
AQSh prezıdenti Djo Baıden óz málimdemesinde el úkimetiniń Gavaııge jalynmen kúres júrgizýge kómek jibergenin jáne qutqarý jumystaryn jalǵastyryp jatqanyn atap ótti. Lahaına – Maýıdiń batys shetindegi tarıhı qala.
Ol AQSh-tyń tarıhı oryndarynyń Ulttyq tizilimine engizilgen.