Ǵasyr jasaǵan qaraǵandylyq keıýana áli kúnge deıin qar kúreıdi

QARAǴANDY. QazAqparat – Qaraǵandy oblysy Abaı aýdany Qulaıǵyr aýylynda 102 jastaǵy qarııa turady. Sábılá Ormanbaeva qarttyǵyna qaramastan áli tyń. Qar shyǵaryp, maldy óriske jiberip, tamaq jasaý tirligin áli ózi tyndyrady, dep habarlaıdy QazAqparat tilshisi.

Abaı aýdanynyń eń egde turǵyny, 102 jastaǵy qarııa Sábılá Ormanbaevaǵa qarap, Qulaıǵyr aýylynyń halqy oı men boı túzeıdi. Zeınetkerdiń tańy qysta úı aýlasynyń qaryn tazalaýmen bastalady.

Ol jasynan eńbekke aralasyp, qara jumystyń qazanynda qaınaǵan. 30-jyldardyń alasapyranynda egin saldy, shabyndyqqa shalǵy siltedi, shóp úıdi. 17 jasynda Qulaıǵyr aýylynda saýynshy bolyp eńbek etedi. Kúnine 30-dan astam sıyr saýatyn bolǵan. Jańa buzaýlaǵan asaý qunajyndardy tik turǵyzyp, úıretip berý de qarshadaı qyzǵa mindettelgen.

«Biz tańerteń erte turatynbyz, óıtkeni 30-dan astam sıyrdy saýyp úlgerý kerek bolatyn. Men saýynshy qyzdardyń qatarynda eń jyldam boldym jáne saýǵan sútim taza bolatyn. Sondyqtan, men eki ese kóbirek jalaqy aldym. Jumys talǵamaıtynmyn, barlyǵyn istep júre beretin edim», - deıdi Sábılá apa.

Sábılá Ormanbaeva 9 balamen jesir qalǵan. Kúndiz kolhozdyń tirligi, túnde úıdiń sharýasymen aınalysyp, urshyq ıirip, kıim toqyp, perzentterin jetkizgen. Ǵasyr jasaǵan ana «osy ýaqytqa deıin tyń bolýy tynymsyz tirliktiń arqasy» ekenin aıtady.

«Árqashan jumystan úıge júgiretinmin. Tipti, kórshilerge baryp, shaı ishýge ýaqyt bolmaıtyn. Men úshin basty maqsat – balalarymdy tárbıelep, jetkizý boldy», - dep eske alady zeınetker.

Ozat saýynshy zeınetkerlikke shyqqan soń da bul kásipten ketpegen. Іri qara ustap, 100 jasyna deıin sıyr sýyp, ónimin jaratqan eken.

«Byltyrǵa deıin eki sıyr saýdym, bul men úshin esh qıyn bolǵan joq. Men qazir de úıdi jınap, pesh jaǵyp, eden jýamyn, qol qýsyryp otyrǵandy unatpaımyn», - deıdi zeınetker apa.

Sábılá Ormanbaeva eńbek dańqy ordeniniń ıgeri. «Altyn alqa» jáne «Ana Dańqy» medalmen marapattalǵan. Elimizde ótkiziletin saıası mańyzdy oqıǵalardan tys qalmaıdy. Qulaıǵyr aýylynyń eń úlken turǵyny jerlesterine úlgi bolyp, saılaýda daýys berýge birinshi bolyp barady eken.

«Densaýlyq jarap tursa, kóńil-kúıim de kóteriledi. Men eshqashan aýyrmadym, ýkoldardan qorqamyn. Biraq, qazir qajet bolǵan jaǵdaıda dári ishemin», - deıdi Sábılá apa.

Eńbek adamy búginde japyraǵyn jaıǵan báıterekke aınaldy. Perzentteri – bir-bir salanyń myqty mamany. Búginde 25 nemere, 6 shóbere súıip otyr.

«Endi shópshegimniń alaqanynan sý ishsem, armanym joq», - deıdi batyr ana.