Ǵarysh týrısteri orbıtada: «Dragon» jolaýshylarynyń alǵashqy sýretteri jarııalandy

NUR-SULTAN. QazAqparat – Jer mańaıyndaǵy orbıtadaǵy Inspiration 4 mıssııasy ekıpajynyń alǵashqy sýretteri paıda boldy. Ushyrylymdy kásipker Ilon Masktyń SpaceX kompanııasy uıymdastyrdy, dep habarlaıdy QazAqparat VVS-ge silteme jasap.

Fotosýretterde beınelengendeı, áýesqoı astronavtar ǵaryshtyq kapsýlanyń ishinde óte jeńil kúıde ilinýli, planetany ıllıýmınatordan qarap, óz isterimen aınalysýda.

Mıllıarder Djared Aızekman jáne onyń áriptesteri Heılı Arseno, Sıan Proktor jáne Krıs Sembroskı sársenbi kúni Florıdadaǵy ǵarysh aılaǵynan ushyryldy.

Bul – kommertsııalyq mıssııamen orbıtaǵa shyqqan alǵashqy áýesqoı ekıpaj. Mıssııanyń negizgi maqsattarynyń biri –álemdegi qaterli isik aýrýyn emdeýdiń eń iri ǵylymı-klınıkalyq ortalyǵy bolyp sanalatyn Memfıstegi Áýlıe Iýda Faddeı balalar ǵylymı-zertteý aýrýhanasyna 200 mıllıon dollar qaıyrymdylyqqa aqsha jınaý.

«Dragon» kemesi astronavtardy 590 km bıiktikke kóterdi, bul Halyqaralyq ǵarysh stantsııasynyń orbıtasynan shamamen 160 km jáne Habbl ǵaryshtyq teleskopynan 50 km joǵary.

Ekıpaj demalys kúnderi Jerge oralýy kerek. Olardyń kapsýlasy Atlant muhıtyna qonady.