Gansý raýshandary Qazaqstanǵa eksporttaldy - sheteldegi qazaq baspasózi
Gansý raýshandary Qazaqstanǵa eksporttaldy - «Halyq» gazeti
Qytaıdyń Gansý ólkesiniń Lınsıa Dúńgen avtonomdy oblysynan 6000 tal jańa kesilgen raýshan gúli Qazaqstanǵa ushaqpen jiberildi. Bul - balǵyn Lınsıa raýshandarynyń alǵashqy eksporty, dep habarlaıdy Qytaıdyń «Halyq» gazeti basylymy.
Atalǵan basylymnyń dereginshe, jańa gúlderdiń qaýipsiz jáne jyldam jóneltilýin qamtamasyz etý úshin Lınsıa Baiyi Yinong halyqaralyq gúl porty búkil protseste kepildik etti.
Atap aıtqanda, shapshań qabyldaý jáne tasymaldaý, turaqty temperatýrada saqtaý, tıisti protsedýralardan jyldam ótý, sondaı-aq tıeý jáne jetkizý sharalaryn atqardy. Bul joly alǵashqy sheteldik tapsyrys Qazaqstanǵa jóneltildi. Jıyny 4 000 AQSh dollary somasyndaǵy 10 000-nan astam gúl eksporttalǵan.
Ulttyq sportqa arnalǵan kezdesýge sheteldegi qazaq tildi BAQ ókilderi onlaın qatysty - «Kaznews»
«Ulttyq sport qaýymdastyǵy», Bas redaktorlar klýby jáne Ulttyq medıa qaýymdastyǵy uıymdastyrǵan kezdesýge sheteldegi qazaq tildi BAQ ókilderi onlaın formatta qatysty.
Ulttyq sport qaýymdastyǵynyń prezıdenti Islambek Saljanov keler jyly uıymdastyrylatyn V dúnıejúzilik kóshpendiler oıyndary týraly, ulttyq sportty nasıhattaý jáne «ALAMAN» medıa baıqaýy týraly keń kólemde aqparat berdi, dep habarlaıdy Mońǵolııanyń «Kaznews» aqparattyq portaly.
Atalǵan BAQ-tyń málimetinshe, 1 qyrkúıekten bastap bul medıa baıqaýdyń syılyǵy jarııalanady.
Aıta keteıik, baıqaý týraly tolyq aqparatty alaman.ultsport.kz saıtynan bilýge bolady.
Mońǵolııalyq basylymnyń dereginshe, ótken mamyr aıynda Mońǵolııanyń Qazaq Ulttyq sport túrleri federatsııasynyń prezıdenti Rom Áýeshanuly QR Ulttyq sport qaýymdastyǵynyń prezıdenti Islambek Saljanovpen kezdesip, memorandým ornatyp qaıtqan. Qyrkúıek aıynda Baıan-Ólgııde Aýdaryspaqtan Azııa birinshiligin ótkizý josparlanǵan.
Sonymen qatar, osy aptada «Kaznews» aqparattyq portalynda «Fýtbol federatsııasynyń bas demeýshisi retinde Turan World kompanııasy jumys isteıdi» degen taqyryptaǵy aqparat jarııalandy.
Bul týraly aqparat Turan World kompanııasynyń dırektory Erbolat Áshikuly men aımaqtyq Fýtbol federatsııasynyń basshysy Ertaı Oraluly arasyndaǵy kezdesýden keıin belgili boldy.
Taraptar 5 jyldyq yntymaqtastyq týraly kelisimge qol qoıǵan.
Kelisim shart aıasynda aımaqtyq fýtbol quramasynyń kıimderi tolyǵymen jańartylyp, jarystarǵa qatysý úshin qarjylaı qoldaý kórsetilip turady.
Sondaı-aq, atalǵan mońǵolııalyq BAQ-ta «Altai Academy» Reseıdiń Altaı Respýblıkasynyń ýnıversıtetimen yntymaqtastyq ornatty» degen habar jaryq kórdi.
«Kaznews»-tyń keltirgen málimetine súıensek, Baıan-Ólgıı aımaǵynda ornalasqan «Altai Academy» til úıretý ortalyǵy Reseıdiń Altaı Respýblıkasynyń ýnıversıtetimen yntymaqtastyq ornatty. Bul týraly «Altai Academy» ortalyǵynyń dırektory Berik Ákebaıuly habarlaǵan.
Atalǵan yntymaqtastyq boıynsha aımaqtaǵy mektep oqýshylarynyń orys tiliniń biliktiligin arttyrý maqsatynda Reseıden ustazdar Altaı akademııasyna turaqty kelip turmaq.
10 myń metrlik geologııalyq barlaý uńǵymasyn burǵylaý tereńdigi qazir 6 myńǵa jetti - People.cn
Keıingi jyldary Shyńjańdaǵy Taklamakan shóliniń ishki bóliginde ornalasqan Qytaı munaıy Tarym munaı ken orny únemi jańalyqtar ashyp keledi. Olar osy ýaqytqa deıin tereńdigi 8 000 metrden asatyn 104 tereń uńǵymany sátti burǵylaǵan. Bul nátıjeler jospardaǵy tereńdigi 10 000 metr uńǵyma jobasy úshin jetkilikti negizgi jaǵdaılardy, tehnıkalyq daıyndyqty jáne tájirıbe jınaqtaýdy qamtamasyz etti, dep jazady Qytaıdyń People.cn.
Qytaılyq BAQ-tyń málimetinshe, Tarym oıpaty - munaı men gazǵa baı, biraq geologııalyq qurylymy óte kúrdeli aımaq. Osy jyldyń 30 mamyrynda Qytaı munaıy Tarym munaı ken ornynda Qytaıdaǵy alǵashqy 10 000 metrlik geotehnıkalyq barlaý uńǵymasy resmı túrde burǵylana bastaǵan.
Uńǵymada Qytaı derbes ázirlegen, tereńdigi 12 000 metr bolatyn álemdegi alǵashqy ýltra tereń uńǵymalarǵa arnalǵan avtomattandyrylǵan burǵylaý qondyrǵysy ornatylǵan. Óndiris jumystardy 457 kúnde aıaqtaýdy josparlap otyr. Al burǵylaýdyń maqsatty tereńdigi - 11 100 metr.
«Málimetterge sáıkes, 27 tamyzdaǵy jaǵdaı boıynsha qazir burǵylaý tereńdigi 6000 metrge jetken», dep jazady People.cn.
Ózbekstan mınıstrliginde Qazaqstan Elshisimen kezdesý ótti - «ÓzA»
29 tamyzda Ózbekstan Respýblıkasynyń Mádenıet jáne týrızm mınıstrliginde mınıstr O. Nazarbekov pen Qazaqstan Respýblıkasynyń Ózbekstandaǵy Tótenshe jáne Ókiletti Elshisi B. Atamqulovtyń kezdesý ótti, dep habarlaıdy «ÓzA» aqparattyq agenttigi.
Elshilik málimetinshe, dıplomatııalyq ókildiktiń basshysy B. Atamqulov mınıstrdi kele jatqan Ózbekstannyń Táýelsizdik kúniniń 32 jyldyǵymen quttyqtap, 2023 jyldyń maýsym aıynda Ózbekstanda Qazaqstannyń mádenıet kúnderin (Tashkent, Buhara, Samarqand) ótkizýge qoldaý kórsetkeni úshin alǵysyn bildirgen.
Ózbekstandyq BAQ-tyń dereginshe, Elshi Ózbekstannyń Ortalyq Azııanyń tarıhy men qazirgi mádenıetindegi erekshe rólin, sondaı-aq halyqtarymyzdyń rýhanı jaqyndyǵyn atap ótken.
Aıta keteıik, kezdesý barysynda uzaq merzimdi yntymaqtastyqtyń aldaǵy josparlary belgilendi. Taraptardyń resmı aqparat kózderi boıynsha mádenı mazmundy ózara keńeıtý máseleleri talqylandy.
Úrimjide aqyndar aıtysy ótkizildi - «Harajorga»
Qytaıdyń Úrimji qalasyna qarasty Shýımogý aýdany tuńǵysh ret aqyndar aıtysyn ótkizdi. Atalǵan mádenı sharaǵa 500 shaqyrym qashyqtyqtaǵy Shińgil aýdanynyń aqyndary kelip, sahnada óner kórsetti, dep bastaıdy «Harajorga» áleýmettik jelisi «Shyńjań gazetine» silteme jasap.
Qytaılyq BAQ-tyń keltirgen málimetine súıensek, 30 tamyz kúni Úrimji qalasy Shýımogý aýdanyndaǵy eldimekende ótken aıtysta alys-jaqyn óńirden kelgen aqyndar ónerlerin kórsetken.
Atap aıtqanda, Shýımogý aýdany Gyjıagý aýylynda shymyldyǵyn ashqan mádenı sharaǵa Úrimji qalasy Úrimji aýdany, Altaı aımaǵy Shińgil aýdany jáne Sanjy dúngen avtonomııaly oblysyndaǵy Shonjy aýdany qatarly óńirlerden kelgen jyr júırikteri óz ónerleri arqyly jergilikti turǵyndar men týrısterdiń ystyq yqylasyna bólengen.
«Aldymen, sahnaǵa shyqqan 500 shaqyrymnan astam jol basyp Altaı aımaǵynyń Shińgil aýdanynan arnaıy kelgen belgili aıtysker aqyn Sanatbek Baıqadyruly tamasha aıtys ónerimen kórermenderdi tánti etti», dep jazady qytaılyq BAQ.
Úrimji qalasy Shýımogý aýdany mádenıet, dene-tárbıe jáne saıahat mekemesiniń orynbasar bastyǵy Gaý ıAnchınnyń aıtýynsha, bul jolǵy aqyndar aıtysy jańa dáýirdi, jańa ózgeristerdi dástúrli mádenıetpen ushtastyryp, qalyń buqaranyń dástúrli mádenıetiniń qudiretin sezinýine múmkindik jasaǵan. Sondaı-aq, ár halyqtyń dástúrli mádenıetti jetildirýge, jalǵastyrýǵa degen yntasyn oıatqan. Sońǵy ýaqyttarda Shýımogý aýdany mádenıet, dene-tárbıe jáne saıahat mekemesi ártúrli merekelerden paıdalanyp, jalpy halyqtyq alań bıi jarysy, án baıqaýlary sııaqty buqaralyq mádenıet qımyldaryn ótkizip keledi eken.
Qazaqstan astyq eksportyn arttyrdy - «TRT»
Astyqtyń zańsyz kelýine jol bermeý úshin ımportqa tyıym salý merzimin taǵy 6 aıǵa uzartqan Qazaqstan Kavkaz, Qytaı jáne Aýǵanstanǵa astyq eksportyn arttyryp otyr, dep habarlaıdy Túrkııa Radıo Televızııa portaly.
Aıta keteıik bul týraly QR Aýyl sharýashylyǵy mınıstrligi habarlaǵan.
Atalǵan BAQ-tyń keltirgen málimetinshe, 6 aıda Ortalyq Azııa men Aýǵanstanǵa 4,1 mıllıon tonna astyq eksporttaǵan Qazaqstan jyl sońyna deıin bul kórsetkishti keminde 6 mıllıonǵa deıin jetkizedi.
Koronavırýstyq pandemııaǵa baılanysty Qytaıǵa 3 jyl eksporttaı almaǵan Qazaqstan tyıym joıylǵannan keıin 6 aıda 100 myń tonnadan astam bıdaı eksporttady.
Eksportty ulǵaıtý maqsatynda eki el arasynda poıyz jóneltilimin arttyrý týraly kelisimge qol qoıyldy.
Qazaqstan AES salýdy kózdep otyr - «Parstoday»
Qazaqstan AES salý ornyn belgileý men qajetti reaktordy tańdaý boıynsha zertteý júrgizdi. Zertteýler nátıjesi boıynsha Almaty oblysyndaǵy Úlken aýyly AES salýǵa qolaıly jer dep tanyldy.
Bul týraly osy aptada ırandyq «Parstoday» aqparat agenttigi habarlady.
Aıta ketý kerek, Qazaqstan zańdaryna sáıkes, ıadrolyq nysandar salý jáne atom qýatyn paıdalý týraly sheshimdi el úkimeti qabyldaıdy.
«Qazaqstannyń Energetıka mınıstrligi áli AES salatyn kompanııa týraly sheshim qabyldaǵan joq. Qytaıdyń CNNC kompanııasy, Ońtústik Koreıanyń KHNP kompanııasy, Frantsııanyń EDF kompanııasy, Reseıdiń ROSATOM kompanııasy osy jobany oryndaýǵa úmitker retinde qarastyrylyp otyr», dep jazdy ırandyq BAQ.
Saǵattyq jyldamdyǵy 350 km bolatyn temirjol synaqqa berildi - «Halyq» gazeti
Qytaıda alǵashqy jyldamdyǵy saǵatyna 350 shaqyrym teńizden ótetin joǵary jyldamdyqty temirjol synaqqa berildi.
31 tamyz kúni G55501 poıyzy Fýchjoýdyń Ońtústik temirjol vokzalynan jolǵa shyqty. Bul Qytaıdaǵy jyldamdyǵy saǵatyna 350 shaqyrym bolatyn teńizden ótetin alǵashqy joǵary jyldamdyqty Fýchjoý-Sıamen temirjolynyń resmı túrde synaq retinde iske qosylǵanyn bildiredi, dep habarlaıdy kaz.people.cn.
Málimetterge sáıkes, Fýchjoý-Sıamen júrdek temirjoly osy jyldyń ishinde ashylý jáne paıdalaný sharttaryn daıyndaýdy aıaqtaıdy.
Jumys synaǵy joǵary jyldamdyqty relsti ashý aldyndaǵy sońǵy mańyzdy býyn bolyp tabylady. Ol birlesken iske qosylǵannan keıingi syzba boıynsha poıyzdyń jumys shemasynyń parametrlerin synaýdy, aqaýlardy modeldeýdi, avarııalyq-qutqarý jattyǵýlaryn jáne júrgizýdi tekserýdi bildiredi.
