Gambýrg portynda iri órt shyǵyp, gaz ballondary jaryldy

ASTANA. KAZINFORM – Germanııanyń Gambýrg qalasynyń Feddel aýdanynda port mańyndaǵy qoımada iri órt shyqty. Onda avtokólikter saqtalǵan, dep habarlaıdy BILD.

Kýágerlerdiń aıtýynsha, port aýdanynda gaz ballondary jarylyp, qalyń tútin kókke kóterilgen. Qala ústin basqan tútin birneshe shaqyrym qashyqtyqtan da baıqalady.

Oqıǵa ornyna birneshe órt sóndirý brıgadasy men avtosatylar jumyldyryldy. Qatty tútin kórshi kásiporyndarǵa tarady.

Polıtsııa ýaqytsha A1 avtomagıstralin eki baǵytta jaýyp tastady, sebebi jarylystan keıingi metall synyqtary jolǵa shashylyp, keıbir kólikterge túsken.

Órttiń shyǵý sebebi anyqtalyp jatyr.

Aıta keteıik, Gambýrgte pyshaqpen qarýlanǵan áıel 12 adamdy jaraqattady.