Ǵalymdar joıylyp ketken tasmanııalyq jolbarys túrin qaıta tiriltpek

NUR-SULTAN. QazAqparat – Aýstralııa men AQSh-tyń zertteýshiler toby joıylyp ketken tasmanııalyq jolbarys popýlıatsııasyn qaıta tiriltý jobasyna kiristi. Bul qaltaly qasqyr nemese tılatsın dep atalatyn jyrtqyshtardyń sońǵysy ótken ǵasyrdyń 30-jyldarynda ólgen, dep habarlaıdy QazAqparat VVS-ge silteme jasap.

Jobany Melbýrn ýnıversıteti men Garvard ýnıversıtetiniń professory jáne adam genomynnyń shıfryn nashý jobasyn jasaýshylardyń biri Djordj Cherch negizin qalaǵan Colossal Biosciences amerıkalyq bıotehnologııalyq kompanııasy júzege asyrmaq.

Jobaǵa qatysýshy ǵalymdar janýardy baǵanaly jasýshalar men genomdy óńdeý arqyly qalpyna keltirýge bolatynyna senimdi: uqsas DNQ-sy bar tiri qaltaly túrlerinen jasýshalar alyp, sodan keıin joıylyp ketken túrdi nemese soǵan meılinshe jaqyn túrin qalpyna keltirý úshin óńdeledi.

Zertteýshiler qalpyna keltirilgen janýardyń alǵashqysyn shamamen on jyldan keıin jabaıy tabıǵatqa shyǵarýǵa nıetti.

Protsess birqatar ǵylymı jetistikterdi qajet etedi jáne eger sátti iske assa, joıylyp ketken bıologııalyq túrdi reanımatsııalaýdyń alǵashqy jaǵdaıy bolmaq.

Aldyn ala jasalǵan baǵalaýlar boıynsha tılatsındi qalpyna keltirý jobasyna 75 mıllıon dollar qajet. Jobany qarjylandyrýǵa 2017 jyly alǵashqy bıtkoın mıllıarderleri retinde tanylǵan aǵaıyndy Kemeron jáne Taıler Ýınklvostar, sondaı-aq, Marvel kompanııasynyń kartınasynda Tor keıipkerin somdaǵan akter Krıs Hemsvort tartylyp otyr.

Tasmanııalyq jolbarystardy tiriltý ıdeıasy ǵalymdardyń oıynda 20 jyldan beri júr. 1999 jyly Sıdneıdegi Aýstralııa mýzeıi jyrtqyshty klondaýǵa umtylǵan edi. Sodan beri janýardyń qolda bar úlgilerinen DNQ alý nemese bólshekterin qaıta qalpyna keltirýge birneshe talpynys jasalǵan.

«Másele bul jańalyqtyń múmkindiginde emes, qashan júzege asatyndyǵynda», - deıdi Melbýrn ýnıversıtetiniń professory, bıolog-evolıýtsıonıst Endrıý Pask.

Alaıda, bul jobany ǵylymı fantastıkaǵa balap, kekesinmen qaraıtyn sarapshylar da bar.

Foto: gettyimages.com