Ǵalymdar jobalaryn fermerlermen kelisip otyrýy tıis - Shókeev
Mınıstrliktiń keńeıtilgen alqa májilisinde Ulttyq agrarlyq ǵylymı bilim berý ortalyǵynyń basshysy Ulan Tájibaev baıandama jasap jatqan bolatyn. Orta jolda ony toqtatqan Ómirzaq Shókeev statıstıkamen áýestenbeı naqty máseleni talqylaýǵa shaqyrdy.
«Zerthanalarda, kabınetterde, kompıýterlerde oryn alyp jatqan «talmýdtardy» alyp kelińdershi, múldem qyzyǵy joq. Eger Sizder birdeńe jasaı alatyn bolsańdar, egistikke baryńdar, sol jerde bilimderińdi odan ary qalaı taratatyndyqtaryńdy kórsetińder. Kóktemde egip, jaz boıy jumys istep, kúzde kórsetińder. Qazir Ageenko (Andreı Ageenko- Qazaq eginshilik jáne ósimdik sharýashyǵy ǴZI dırektory) baıandama jasaıdy, ol osy shema boıynsha jumys isteıdi», - dedi mınıstr.
Osy rette ǵalymdar úshin fermerlerdiń pikirleri de mańyzdy ekendigine nazar aýdartty.
«Oǵan fermerler de shaqyrylýy tıis. Ázirlemelerdiń qajettigine ne qajetsizdigine fermeler baǵa beredi. Olar ustap kórip: «Iá, mynaý durys, muny qabyldaýǵa bolady. Biraq, bizdiń suraqtarymyz bar», dep aıtýy kerek. Sodan keıin munyń barlyǵy ǴZI-ge qaıtarylyp, olar ózderi oıdan shyǵarǵan emes, dál sol máselelermen jumys isteı bastaıdy», - dedi Ó.Shókeev.
Osy rette Ulan Tájibaev zamanaýı agrotehnologııalardy engizýdiń arqasynda 2017 jylmen salystyrǵanda astyq túsiminiń kórsetkishi eki esege ulǵaıǵanyn atap ótti. Máselen, Baraev atyndaǵy astyq sharýashylyǵy ǵylymı-óndiristik ortalyǵy bazasyndaǵy 3 myń gektar egistik alqabynan gektaryna 25,4-26,7 tsentner ónim alynǵan.