Ǵalymdar kóne túrki tili men ádebıetin zertteý jaıyn talqylady
Abaı atyndaǵy Qazaq ulttyq pedagogıkalyq ýnıversıtetinde belgili túrkitanýshy ǵalym Nemat Kelimbetovti eske alýǵa arnalǵan «Baıyrǵy túrki tili men ádebıetin zertteý máseleleri» atty halyqaralyq ǵylymı jıyn ótti.
Ýnıversıtet janyndaǵy Nemat Kelimbetov atyndaǵy Túrkitaný ortalyǵy uıymdastyrǵan konferentsııaǵa Qazaqstan, Ázerbaıjan, Qyrǵyzstan Ózbekstan jáne Túrkııa elderiniń túrkitanýshy ǵalymdary qatysty.
Jıynda kóne túrki tili men ádebıeti máseleleri talqylandy.
Onlaın-konferentsııanyń ashylýynda Abaı atyndaǵy Qazaq ulttyq pedagogıkalyq ýnıversıtetiniń rektory Takır Balyqbaev, QR Strategııalyq josparlaý jáne reformalar agenttiginiń tóraǵasy, «Astana» halyqaralyq qarjy ortalyǵynyń basqarýshysy Qaırat Kelimbetov, Túrkııa memlekettik Túrik tili qoǵamynyń prezıdenti Gúrer Gúlsevın myrzalar qatysyp, sóz sóıledi.
Jıyn barysynda Nemat Kelimbetov atyndaǵy Túrkitaný ortalyǵynyń ǵylymı qyzmetkerleri Sherýbaı Qurmanbaıuly men Márlen Ádilovtiń «Abaı tiliniń erekshelikteri» atty jańa kitaptyń tusaýkeser rásimi ótti. Kitapta Abaı shyǵarmalaryndaǵy qazirgi qazaq ádebı tilinde kezdespeıtin nemese óte sırek qoldanylatyn tildik erekshelikter morfologııalyq, fonetıkalyq jáne leksıkalyq aıyrmashylyqtar turǵysynan qarastyrylǵan.
Halyqaralyq otyrysqa Shákir Ybyraev f.ǵ.d., prof. (Qazaqstan); Mehmet Ólmez prof., dokt. (Túrkııa); Tashpolot Sadyqov f.ǵ.d., prof. (Qyrǵyzstan); Temirhan Tebegenov f.ǵ.d. prof. (Qazaqstan); Jýraqýzıev Nodırbek PhD dokt., dots. (Ózbekstan); Elchın Ibrahımov PhD dokt., dots. (Ázerbaıjan) syndy túrkolog ǵalymdar kóne túrki tili men ádebıetiniń máselelerine qatysty ǵylymı baıandamalar jasady.
Eske sala keteıik, kórnekti túrkitanýshy ǵalym, belgili jazýshy, talantty aýdarmashy, QR gýmanıtarlyq ǵylymdar akademııasynyń akademıgi, Halyqaralyq Kúltegin, Frants Kafka syılyqtarynyń ıegeri Nemat Kelimbetov budan on jyl buryn 15 jeltoqsan kúni ómirden ozǵan bolatyn.
