Ǵalymdar Qazaqstannyń ústinen ushyp júrgen beımálim nysandardy baqylaýǵa almaq
«Bizdiń jumysymyzda eń paıdaly baǵyttardyń biri - belgisiz spýtnıkerdi baqylaýǵa alý. Biz ondaı túsiniksiz nysandardy jıi kóremiz. Ol qaı elden, ne maqsatpen kelgenin bilmeımiz. Qazir anyqtaý tásilimen zertteý jumystary júrgizilip jatyr. Bul ásirese áskerıler úshin óte qyzyqty taqyryp», - dedi «Fesenkov atyndaǵy Astrofızıkalyq ınstıtýt» dırektory Asylhan Bıbosynov.
«Ionosfera ınstıtýty» AQ qyzmetkerleri Qazaqstanyń aeroǵaryshtyq salasyn zertteý jumystaryna «Orbıta» radıo polıgonyn paıdalanýdy usyndy.
Olardyń aıtýynsha, Orbıta polıgonynda otandyq spýtnıkterdiń qozǵalysyn zerttep, ǵaryshtyq aýa raıyna boljam jasaýǵa bolady.
Qazir polıgondaǵy aqparatty Qazgıdromet pen Roskosmos uıymy paıdalanyp otyr.
«Astrofızıka ınstıtýty» AQ bas ǵylymı qyzmetkeri Aleksandr Serebrıanskıı álemde qazir barlyq el óz geostatsıonarlyq spýtnıkterin ushyra bastaǵanyn aıtty.
«Bul qym-qýyt sáttegi ál-Farabı dańǵylyndaǵy qozǵalysqa uqsaıdy. Tek aıyrmashylyǵy olar 40 myń shaqyrymnan basqarylady. Biz olardyń orbıtasyna, basqa spýtnıkterdiń jaqyndamaýyn qadaǵalap otyramyz. Olar jaqyndaǵan jaǵdaıda Respýblıkalyq ǵaryshtyq baılanys ortalyǵyna habarlaımyz. Olar bizdiń spýtnıktiń sál baǵytyn ózgertip, nemese toqtata turady. Sol ýaqytta ekinshisi ótip ketedi», - dedi A.Serebrıakov.
Qazir Qazaqstanda dıametri 1 metr bolatyn aınasy bar eki teleskop jumys istep tur. Olardyń biri Assy-Túrgen observatorııasynda bolsa, ekinshisi Tıan-Shan astronomııalyq observatorııasynda ornalasqan. Bul nysandarǵa barý úshin týrısterde medıtsınalyq saqtandyrý polısi bolýy shart. Sebebi, munda aparatyn jol óte qaýipti.