Ǵalymdarǵa elimizdegi kez kelgen zerthana qoljetimdi bolady

ASTANA. KAZINFORM — Ǵalymdarǵa elimizdegi kez kelgen zerthana qoljetimdi bolady. Bul týraly Májilistiń jalpy otyrysynda «QR-nyń keıbir zańnamalyq aktilerine ǵylym máseleleri boıynsha ózgerister men tolyqtyrýlar engizý týraly» zań jobasyn tanystyrǵan depýtat Ashat Aımaǵambetov aıtty.

— Ujymdyq paıdalanylatyn zerthanalar tetigi engiziledi. Bul norma bıýdjet esebinen satyp alynǵan ǵylymı ınfraqurylymdy tıimdi ári barshaǵa qoljetimdi paıdalaný úshin óte mańyzdy. Mysaly, bir ýnıversıtette zamanaýı zerthana bar. Ol zerthana Qazaqstanda nemese tutas óńirde bireý ǵana. Qazir ony tek sol uıymnyń ǵalymdary ǵana paıdalanýda. Endi osy zańda dál osyndaı zerthanalardy basqa da ǵalymdarǵa qoljetimdi etý úshin «arnaıy ujymdyq paıdalaný zerthanalary» degen uǵym jáne tıisti tetik engizilýde, — dedi Májilis depýtaty.

Onyń aıtýynsha, arnaıy aqparattyq júıede kez kelgen ǵalymǵa qaı jerde qandaı zerthana bar, ol qaı ýaqytta bos jáne onda qalaı zertteý júrgizýge bolatyny kórsetiledi.

— Osy arqyly ǵylymı ınfraqurylymdy tıimdi paıdalanýǵa múmkindik ashylady, — dedi Ashat Aımaǵambetov.

Aıta keteıik, atalǵan zań jobasy aıasynda ǵylymı jobany bastaý merzimin naqty sol kelisimshart bastalǵan kúnnen belgileý kózdelgen.