Ǵalymdardyń jalaqysyna qosymsha ústemeaqy engizile me
ASTANA. KAZINFORM – Búgin Májilistiń jalpy otyrysynda «Qazaqstan Respýblıkasynyń keıbir zańnamalyq aktilerine ǵylym máseleleri boıynsha ózgerister men tolyqtyrýlar engizý týraly» Qazaqstan Respýblıkasy zańynyń jobasy talqylanyp jatyr.
Áleýmettik-mádenı damý komıtetiniń tóraǵasy Ashat Aımaǵambetovtyń aıtýynsha, bul zań jobasy Májilis pen Senat depýtattarynyń bastamasymen ázirlengen. Onyń basty maqsaty – ǵylym men bilim salasyndaǵy zańnamany jetildirý.
«Jobamyzda Memleket basshysynyń osy baǵyttardy damytý úshin bergen birshama tapsyrmasy da qamtylyp otyr. Birinshi – ǵalymdar úshin jańa úsemeaqylar engizý. Qazirgi ýaqytta ǵylymı-zertteý ınstıtýttarda nemese ýnıversıtetterde isteıtin ǵalymdarymyz PhD, ǵylym doktory, ǵylym kandıdattary sııaqty ǵylymı dárejeleri úshin aı saıyn jalaqysyna qosymsha ústemeaqy alady. Ol baıaǵydan bekitilgen norma. Endi olarǵa professor nemese dotsent sııaqty ǵylymı ataqtary úshin jalaqysyna qosymsha aqy berý osy zań jobasynda usynylyp otyr. Mysaly, PhD, ǵylym kandıdaty qazir aı saıynǵy jalaqysyna atalǵan ǵylymı dárejesi úshin 62 myń teńgege jýyq ústemeaqy alady. Endi oǵan dotsent degen ǵylymı ataǵy úshin taǵy 30 myń teńgege jýyq ústemeaqy qosylady. ıAǵnı aı saıyn 92 myń teńgeni aılyǵyna qosymsha ústemeaqy retinde alýǵa múmkindik beriledi. Al endi ol ǵylym doktory bolsa jáne qazirgi ýaqytta 130 myń teńgege jýyq ústemeaqy alyp otyrsa, onda ol bul zań qabyldanǵannan keıin professor ataǵy úshin taǵy da qosymsha 60 myń teńgege jýyq ústemeaqy alady. Barlyǵyn qosqanda 190 myńǵa jýyq ústemeaqy jalaqysyna qosylady. Bul ǵalymdarymyzdyń qoldaýdyń mańyzdy tetigi dep sanaımyz», - dedi ol.
Onyń atap ótýinshe, munan bólek zań jobasynda jetekshi ǵalymdarymyz ǵylymı-zertteý ınstıtýtynda nemese ýnıversıtette 5 jyldan astam jumys istese, onda olarǵa 1 jylǵa deıin shyǵarmashylyq demalys berý kózdelgen. Sonymen qatar osy ýaqyttyń ishinde olar aı saıyn ortasha jalaqy alyp otyrady.
«Bir jyldyń ishinde ǵalymdarymyz monografııalaryn shyǵarýǵa, ǵylymı zertteý jumysyn aıaqtaýǵa jáne maqalalaryn shyǵarýǵa úlken múmkindik alady», - dedi depýtat.
