Ǵalymdar vılt aýrýyna tózimdi maqta surpyn shyǵardy

ASTANA.KAZINFORM — «Maqta jáne baqsha daqyldary aýyl sharýashylyǵy tájirıbe stantsııasy» JShS jańa maqta surpy — «Maqtaaral-5030» boıynsha synaqtardyń sońǵy kezeńin aıaqtap jatyr. Aǵymdaǵy maýsymda bul surypqa patent alý josparlanyp otyr.

— Synaq nátıjeleri bul suryptyń joǵary agronomııalyq áleýetke ıe ekenin kórsetti. Vegetatsııalyq kezeńi — 110–115 kún. Shıki maqtanyń ónimdiligi — gektaryna 43,5 tsentner, bir qaýashaqtaǵy maqta massasy — shamamen 6,1–6,2 gramm. Talshyq shyǵymy — 39,7%, uzyndyǵy — 33,5 mm, mıkroneır — 4,5, bul toqyma ónerkásibine qajetti sapa talaptaryna tolyq sáıkes keledi. Talshyqtyń syzyqtyq tyǵyzdyǵy — 5300 mteks, úzilý júktemesi — 4,9 g/s.

Mamandardyń erekshe nazaryn aýdartqany — suryptyń vılt aýrýyna joǵary tózimdiligi: juqtyrý jaǵdaıynda zaqymdaný deńgeıi nebári 0,1% boldy, bul «Bereke-07» standartty surpymen salystyrǵanda (onda bul kórsetkish 0,4%-dan joǵary) áldeqaıda tómen, — delingen AShM habarlamasynda.

Morfologııalyq belgileri boıynsha «Maqtaaral-5030» — butalary jaıyla ósetin, bıiktigi 120 sm-ge deıin jetetin ósimdik. Sımpodıaldy butaqtar 4–5-shi býynda qalyptasady. Ósimdiktiń japyraqtary — iri, jasyl tústi. Qaýashaqtary 4–5 qalaqshaly, dóńgelek pishindi, pisip-jetilgende jaqsy ashylady. Talshyǵy — aq ári taza. 1000 tuqymnyń salmaǵy — shamamen 125 gramm.

Suryp agrotehnıkalyq jaǵdaılarǵa, ásirese erte sebý merzimderinde jaqsy beıimdeledi. Usynylatyn egis shemasy — 90×1×10. Mashınamen jınaýǵa jaqsy beıimdelgen. Ortasha tuzdanǵan jáne qunarsyz topyraqtarda ósimdikterdiń jıiligin gektaryna 130–135 myń danaǵa deıin jetkizý usynylady. Eń joǵary nátıje ónim qalyptasýynyń belsendi kezeńinde ýaqtyly sýarý júrgizilgen jaǵdaıda baıqalady.

2024 jyldan bastap «Maqtaaral-5030» sorty Qazaqstanda aýdandastyrýǵa ruqsat etilgen sorttar tizimine engizildi.

Aıta ketelik maldyń jaı-kúıin anyqtaıtyn smart sheshim oılap tabylǵany týraly jazǵan edik.