Ǵalymdar qazaq tilindegi medıtsınalyq termınderdiń sózdigin shyǵarmaqshy

ASTANA. KAZINFORM — Semeı qalasynda QR Densaýlyq saqtaý mınıstrliginiń Medıtsınalyq termınologııa komıssııasy men Semeı medıtsına ýnıversıteti birlesip Respýblıkalyq termınologııalyq konferentsııa ótkizdi. Bul týraly vedomstvonyń baspasóz qyzmeti málim etti.

Konferentsııanyń kún tártibinde bekitilgen medıtsınalyq termınderdiń biryńǵaı sózdigin ázirleý, densaýlyq saqtaý salasyndaǵy normatıvtik quqyqtyq aktilerdiń termınologııalyq bazasyn qalyptastyrý jáne ózekti medıtsınalyq termınologııa sózdigin jasaý máseleleri qaraldy.

— Konferentsııa barysynda jas ǵalymdar medıtsınalyq termınologııaǵa qatysty ózekti máselelerdi talqylady. Olar ǵylymı jarııalanymdardaǵy abbrevıatýralardy, normatıvtik quqyqtyq aktilerdegi termınderdi jáne ǵylymı-medıtsınalyq tildiń júıelenýin taldaýǵa erekshe nazar aýdardy. Bólek taqyryp retinde salalyq jasandy ıntellektti engizý máselesi kóterildi, onyń ishinde KAZHealthGPT júıesin ázirleý de bar, — delingen habarlamada. 

Sonymen qatar, qatysýshylar «Memlekettik tildegi 100 medıtsınalyq oqýlyq» jobasynyń bolashaǵyna senim bildirdi.

Motıvatsııa retinde qazaq tilinde oryndalǵan ǵylymı jumystardy yntalandyrýdy jáne ǵylymı jýrnaldardaǵy úzdik jarııalanymdar úshin syıaqylar taǵaıyndaýdy usyndy. Jas ǵalymdar bul bastamalardyń tabysty bolýyna memlekettik tildiń ǵylym salasyndaǵy róliniń artýy sebep bolady dep sanaıdy.

Olar qazaq tili tek kúndelikti ómirde ǵana emes, ǵylymda da laıyqty oryn alýy tıis ekenin atap ótti.

Buǵan deıin habarlanǵandaı, elimizde respýblıkalyq termınologııalyq komıssııa quryldy.