Ǵalymdar akkýmýlıator batareıalarynyń qaýipsizdigine alańdaýly
ASTANA. KAZINFORM – Akkýmýlıatorlyq batareıalardy qaıta óńdeý jáne kádege jaratý úshin tıisti ınfraqurylym bolmasa qaýip týdyrady. Bul pikirdi Nazarbayev University energetıka jáne jańa materıaldar ǵylymı ortalyǵynyń dırektory, professor Jumabaı Bákenov alǵa tartty.
«Lıtıı-ıondy batareıalar óte qaýipti. Olardy kádege jaratý jáne qaıta óńdeý úshin arnaıy tehnologııalar qajet, óıtkeni olardyń quramynda janǵysh jáne ýly materıaldar bar. Uıaly telefonnyń kishkentaı batareıasynda qanshama energııa bar, al elektromobıl batareıasynyń qýatyn elestete berińiz», - deıdi Jumabaı Bákenov elordada ótip jatqan INESS-2024 halyqaralyq konferentsııasynda.
Sondaı-aq, konferentsııaǵa shaqyrylǵan qonaqtardyń arasynda Samsung SDI-diń burynǵy bas ınjeneri, professor Sýn sý Kım boldy. Ol kezinde Samsung akkýmýlıatorlaryn óndirýge jaýapty bolǵan.
Sheteldik meıman J.Bákenovtyń lıtıı-ıondy akkýmýlıatorlardyń qaýiptiligi týraly dáıegin qoldap otyr. S. Kım elektromobılderdiń ishine ornatylǵan batareıalar jan - jaqty jáne belgili bir jaǵdaılarda óte jarylǵysh energııa kózi ekenin túsindirdi.
Alaıda, maman Qazaqstan elektromobılder sanynyń ósýine áli alańdamaýyna bolatynyn aıtady.
Onyń sózinshe, qazaqstandyq ǵalymdardyń paıdalanylǵan akkýmýlıatorlardy bolashaqta kádege jaratý nemese qaıta óńdeý úshin tehnologııalardy daıyndaýǵa jetkilikti ýaqyty bar. Sonymen qatar Sýn sý Kım paıdalanylǵan akkýmýlıatordy joıý jáne qaıta kádege jaratý ońaı protsedýra emes jáne tıisti ınfraqurylymdy daıyndaý bes jylǵa deıin sozylýy múmkin ekenin aıtyp otyr.
Aıta keteıik, búgin Nazarbayev University-de qazaq ǵalymy Qanysh Sátbaevtyń 125 jyldyq mereıtoıyna arnalǵan INESS-2024 nanomaterıaldar jáne energııa saqtaýdyń ozyq júıelerine arnalǵan 12-shi halyqaralyq konferentsııasy bastaldy.
Úsh kúnge sozylatyn (7-9 tamyz) INESS konferentsııasy Ortalyq Azııadaǵy nanomaterıaldar men energııa saqtaý júıeleriniń sońǵy trendterin talqylaýǵa arnalǵan jetekshi platforma bolyp otyr. Aıtýly sharaǵa Japonııa, Germanııa, Qytaı, Ońtústik Koreıa, Reseı, Ulybrıtanııa, Taıvan jáne Qazaqstannan 150-den astam zertteýshi ǵalymdar qatysýda.
Bıyl INESS halyqaralyq konferentsııasynda energııa saqtaý júıelerine arnalǵan ozyq materıaldar, sensorlyq materıaldar men tehnologııalar, energııa saqtaýdyń balama júıeleri, jańartylatyn energııa kózderi, ekologııa jáne turaqty damý sııaqty mańyzdy salalardaǵy tehnologııalyq jetistikterdiń máseleleri men keleshegi talqylanady.
Uıymdastyrýshylardyń aıtýynsha, jasyl energetıka jáne energııany saqtaý júıelerine arnalǵan ozyq nanomaterıaldar salasyndaǵy zertteýler aıryqsha ózekti.
