Ǵalym sý tasqynynyń sebebin túsindirdi
ASTANA. KAZINFORM – «Geografııa jáne sý qaýipsizdigi ınstıtýty» AQ, Tabıǵı qaýipter zerthanasynyń bas ǵylymı qyzmetkeri Nıkolaı Popov bıylǵy sý tasqyny týraly óz pikirin aıtty.
Ǵalymnyń aıtýynsha, sý tasqynyna qardyń mólsheri de áser etedi. Bıyl Qazaqstannyń soltústik bólikterinde qar shamadan birneshe ese kóp túsken.
«Osyǵan qaraǵanda, sý tasqyny, eń aldymen, kóktem kelip, qardyń qarqyndy erýimen baılanysty bolyp otyr. Taǵy bir mańyzdy másele: atmosferalyq jaýyn-shashynnyń túsýi men topyraqtyń aldyn ala ylǵaldanýy bir ýaqytta boldy. Ásirese, aıaz bolǵan jerlerde topyraq qatyp qalsa, erigen qar sýy ózenderge tez quıyla bastaıtyn qabat qalyptasady. Nátıjesinde sý tasqynynyń tolqyny paıda bolady. Qazirgi ýaqytta mundaı tolqyn Esilde júrip jatqanyn kórip otyrmyz», - dedi spıker Respýblıkalyq aqparattyq shtabta ótken brıfıngte.
Dál osyndaı tolqyn Jaıyq ózeninde de qozǵalyp keledi. Ol negizinen Reseı aýmaǵynda erigen qar sýynan quralady.
«Bir jaǵynan, sý tasqyny – tabıǵı fenomen. Bul –salystyrmaly túrde sırek kezdesetin qubylys. Shynynda da, sońǵy 80 jylda mundaı oqıǵa bolmaǵan. Gıdrologtar munyń júz jylda, elý jylda bir ret bolýy múmkin sý tasqyny ekenin aıtyp otyr. Barlyq sý tasqyny eseptelgen. Biraq onyń qashan bolatynyn aldyn ala boljaý óte qıyn. Óıtkeni tek búgingi kúnniń emes, basqa da boljamdar qajet. Bul bir ǵana jaǵdaı emes. Qazir Soltústik Eýrazııany túgel sý basyp jatyr. Reseıde kóptegen qıyndyq bolyp jatyr, qalalar sý astynda qaldy. Bizde de osyndaı jaǵdaı bolyp jatyr. Bul rette Úkimettiń adamdarǵa qoldaý kórsetip, barlyq kúsh-jigeri men quraldaryn adamdardyń qaýipsizdigin qamtamasyz etýge baǵyttaǵany qýantady», - deıdi ǵalym.
