Ǵalym Qunypııa Alpysbaev dúnıeden ótti

ASTANA. KAZINFORM – Qazaqstan Jazýshylar odaǵynyń múshesi, ádebıettanýshy ǵalym, fılologııa ǵylymdarynyń doktory, professor, QR bilim berý úzdigi Qunypııa Alpysbaev ómirden ozdy. Bul týraly Mádenıet jáne aqparat mınıstrliginiń baspasóz qyzmeti habarlady. 

Qunypııa Alpysbaev 1949 jyly tamyzdyń 4 juldyzynda Qytaı Halyq Respýblıkasynyń Baıandaı aýylynda dúnıege kelgen. 

Qazaq memlekettik ýnıversıtetiniń fılologııa fakýltetin támámdap, ýnıversıtet basshylyǵynyń usynysymen kásipodaq komıteti tóraǵasynyń orynbasary, daıyndyq bólimi dekanynyń orynbasary, syrttaı oqytatyn fılologııa fakýltetiniń dekany qyzmetterin atqardy.

1986 jyly «Qazirgi qazaq poemasynyń janrlyq máseleleri» jáne 2000 jyly «Qazaq ádebıetindegi tarıhı shyǵarma: tanym men kórkemdik» atty taqyrypqa doktorlyq dıssertatsııa qorǵap, 2001 jyly professor ataǵyna ıe boldy. Elimizde alǵash ashylǵan «ádebı shyǵarmashylyq» jáne «kórkem aýdarma teorııasy» sekildi mamandaryn daıyndaýda sapaly oqý-ádistemelik keshenderi men baǵdarlamalaryn ázirlegen. Kóptegen syn-zertteý maqalasynyń birqatary shetelde, ıaǵnı, Túrkııa, Qytaıda basylǵan.

QR Mádenıet jáne aqparat mınıstrliginiń ujymy Qunypııa Qojahmetulynyń ómirden ótýine baılanysty týystary men jaqyndaryna kóńil aıtady.