Fýtzaldan Qazaqstan sýperkýbok oıyny alǵash ret Oralda ótedi

ORAL. KAZINFORM –  Fýtzaldan Qazaqstandaǵy jańa maýsym Oral qalasynda ótetin sýperkýbok matchymen resmı túrde bastalady.

BQO Dene shynyqtyrý jáne sport basqarmasynan málim etkenindeı, el chempıonatynyń jeńimpazy – almatylyq «Qaırat» pen Qazaqstan kýbogynyń ıegeri – «Semeı» komandalary arasynda ótetin sýperkýbok oıyny 23 tamyzda «Jaıyq arena» sport kesheninde ótedi.

Bul kezdesýdiń ereksheligi – fýtzal tarıhynda alǵash ret sýperkýbok básekesi Batys Qazaqstan oblysynda zamanaýı sport kesheninde ótkizilmek. Bul aımaqtaǵy fýtzaldyń damýyna jańa serpin berip, jergilikti jankúıerler úshin aıtýly oqıǵaǵa aınalatyny sózsiz.

«Jaıyq arena» ashylǵannan beri bıyl sport kesheninde kóptegen jarys uıymdastyrylyp keledi. Sonyń ishinde voleıboldan erlerdiń ulttyq lıga komandalary arasynda pleı-off básekesi osynda ótip, Qazaqstan chempıony anyqtalǵan bolatyn.

Eske sala keteıik, budan buryn «Qaırattyń» Qazaqstan chempıonatynyń jeńimpazy atanǵanyn jazǵan edik.