Fýtbolıster bıi: SQO-daǵy aýyl erekshe bıimen kópshilikke tanyldy
PETROPAVL. KAZINFORM — Soltústik Qazaqstan oblysy Kókalajar aýylynyń turǵyndary bımen erekshelendi. Jarty ǵasyr buryn eldi mekende paıda bolǵan bul bı búginde dástúrge aınalyp, urpaqtan urpaqqa berilip keledi.
Áleýmettik jelide qyz uzatý toıynan beınejazba tarady. Bul joly toıdaǵy bı kópshilikti tánti etti. Qalyńdyq, úlken-kishisi — barlyǵy 30-40 shaqty adam ortaǵa shyǵyp, barlyǵy «fýtbolıster bıi» dep atalǵan kóńildi bıdi bıledi.
Eldi meken turǵyny Gúlbarshyn Topınanyń aıtýynsha, buryn Gavrılovka, qazir Kókalajar dep atalǵan aýylda sport birinshi orynda turǵan. Ásirese fýtbolıster komandasy myqty bolǵan eken. Bul bı osyndaı kezekti jeńisten keıin ómirge keledi.
— Komanda jeńip kelgennen keıin únemi úlken mereke bolatyn. 1970 jyldary men aýyldyq klýbta jumys istedim. Birde bı kezinde jigitter birdeı qımyl-qozǵalys jasady. Keıin kezdesken saıyn osy bıdi mindetti túrde bıleıtin boldy, bıleýshiler qataryna fýtbolısterdiń áıelderi, dostary, balalar qosyldy, — deıdi Gúlbarshyn Topına.
Gúlbarshyn Topına qazir aýylda kitaphanashy bolyp eńbek etedi. Aıtýynsha, ýaqyt ótse de, bı umyt qalǵan joq, qazir ol jastardyń da súıikti bıine aınalǵan.
— Qazir qandaı toı bolmasyn, aýylda, qalada bolsyn — basymyz qosylǵanda bıleımiz. Erli-zaıypty Serik-Manar Satıevter, Orynbaı Satıev, Nıkolaı Gýrın jáne basqalary alǵashqy bıshilerimiz boldy. Qazir zeınetker, jastary jetpisten asqan. Búginde qatarǵa olardyń nemereleri qosyldy, — deıdi aýyl turǵyny.
Bir kezde 900-ge jýyq turǵyny bar aýyl, sońǵy jıyrma jylda úsh ret qysqarǵan. Biraq sportqa degen qyzyǵýshylyq saqtalyp qalypty.
— 70-80 jyldary aýylda fýtbol jáne qazaqsha kúres qatty damydy. 2000 jyldary shańǵy sportyna qyzyǵýshylyq artty. Biraq jattyqtyrýshy Kókshetaý qalasyna kóship ketip, ornyna grek-rım kúresinen Qızat Aıtqojın degen bapker keldi. Qazir ol ulttyq sport túrlerin damytyp jatyr. Bizdiń kókparshylarymyz aýdandyq quramaǵa engen. Jigitterimiz báıgeden de jetistikterge jetip júr, — deıdi Gúlbarshyn Topına.
Aýyl ákimdiginiń málimetinshe, qazir Kókalajarda 300-den astam adam turyp jatyr. Basqa eldi mekenderge qaraǵanda áleýmettik jaǵdaı jasalǵan, orta mektep, medpýnkt, ákimdik, poshta, kitaphana, eki mýzeı jumys isteıdi.
Buǵan deıin tek qulpytas jasaýmen aınalysatyn SQO-daǵy erekshe aýyl týraly jazǵan edik.