Fýtboldan Qazaqstan - Túrikmenstan kezdesýi jabyq túrde ótedi
ASTANA. KAZINFORM - Fýtboldan Qazaqstan quramasynyń Birikken Arab Ámirligindegi oqý-jattyǵý jıyny aıasynda Túrikmenstanmen kezdesýi jabyq túrde ótedi.
Bul jóninde Qazaqstan fýtbol federatsııasy málim etti.
«Eki jaqtyń sheshimi boıynsha 14 naýryzǵa josparlanǵan Túrikmenstan quramasyna qarsy baqylaý matchy jabyq túrde bolady. Atalǵan oıynnyń basty maqsaty – bapkerlik shtabtyń Grekııamen bolatyn matchta taktıkalyq sátterin synap kórýi», - dep atap ótti federatsııadan.
Aıta ketsek, Birikken Arab Ámirlikterinde ótetin oqý-jattyǵý jıyny 19 naýryzǵa deıin sozylady.
Ulttyq quramaǵa shaqyrtý alǵan oıynshylardyń basym bóligi jınaldy.
Endi Túrkııa men Reseı chempıonatynda oınaıtyn Abat Aıymbetov, Baqtıer Zaınýtdınov, Nuraly Álip jáne Aleksandr Zýev qatarǵa keıin qosylady.
Qazaqstan quramasy Ulttar lıgasynda S jolymen 21 naýryzda jartylaı fınalda syrt alańda Grekııamen kezdesedi.
Jeńgen jaǵdaıda 26 naýryzda taǵy da syrt alańda Grýzııa-Lıýksembýrg jubynyń jeńimpazymen sheberlik baıqasady.
