Fýtboldan Qazaqstan quramasynyń bas bapkeri qyzmetinen kete me
ASTANA. KAZINFORM – Týrızm jáne sport mınıstri Ermek Marjyqpaev Fýtboldan Qazaqstan quramasynyń bas bapkerine qatysty pikir aıtty.
«Fýtboldan Qazaqstan quramasynyń bas bapkeri aýyspaıdy. Onyń jumys isteıtinine senimdimiz. Oǵan qatysty (Magomed Adıevpen) kelisimshart 2025 jyly bitedi», - dedi E.Marjyqpaev Parlament Májilisinde tilshiler suraǵyna jaýap bere otyryp.
Aıta keteıik, búgin Májilistiń Áleýmettik-mádenı damý komıtetiniń otyrysynda Qazaqstan fýtbol quramasynyń bas bapkeri Magomed Adıevti ornynan alý týraly usynys aıtyldy. Depýtattar aldynda eldegi sport pen týrızmniń damý barysy týraly esep bergen Týrızm jáne sport mınıstri Ermek Marjyqpaevqa fýtboldyń tóńireginde suraq kóp qoıyldy.
«Fýtbol jankúıeri retinde ótinishim bar. Ulttyq quramadaǵy bas bapkerimizge kóz tıgen be, birdeńe. «Ahmat» oınasa da jeti gol kirgizedi, bizde oınasa da bes gol kirgizedi. Osy kisiniń biliktiligi jaıly másele kóterip, aýystyrý kerek sııaqty», - dedi Májilis depýtaty Rınat Zaıtov.
Eske sala keteıik, jaqynda Magomed Adıev Reseıdiń «Ahmat» komandasynyń bas bapkeri qyzmetine taǵaıyndaldy.
Magomed Adıev 2022 jyldan beri Qazaqstan quramasynyń bas bapkeri qyzmetin atqaryp keledi. Sodan beri 22 oıynnyń 11-de jeńiske jetip, 1-de teń oınasa, qalǵanynda qarsylastarǵa ese jiberdi.
