Fýtboldan álem chempıonatynyń fınaldyq kezeńine shyqqan taǵy úsh qurama belgili boldy
ASTANA. KAZINFORM - Fýtboldan 2026 jylǵy álem chempıonaty fınaldyq kezeńine taǵy úsh qurama joldama aldy.
Mundaı múmkindikke Ońtústik Amerıka qurlyǵynan Ýrýgvaı, Kolýmbııa jáne Paragvaı quramalary ıe boldy.
Óz alańynda Ýrýgvaı quramasy Perýdi, Kolýmbııa Bolıvııany 3:0 esebimen jeńse, Paragvaı men Ekvador 0:0 esebimen teń tústi. Nátıjesinde Ýrýgvaı 27, Kolýmbııa men Paragvaı 25 upaı jınap, álem chempıonaty joldamasyna qol jetkizdi. Sondaı-aq dúbirli dodaǵa Argentına, Ekvador, Brazılııa quramalary shyǵyp qoıǵan edi.
Ońtústik Amerıka qurlyǵy boıynsha irikteý kezeńiniń aıaqtalýyna nebári bir ǵana týr qaldy. Endi 9 qyrkúıekte Chılı men Ýrýgvaı, Bolıvııa men Brazılııa, Venesýela men Kolýmbııa, Perý men Paragvaı, Ekvador men Argentına oınaıdy.
Qazirge deıin álem chempıonatyna AQSh, Kanada, Meksıkadan ózge Azııadan Japonııa, Iran, Ózbekstan, Ońtústik Koreıa, Iordanııa, Aýstralııa, muhıt aımaǵynan Jańa Zelandııa qatysatyny belgili boldy.
Ázirge Afrıka, Soltústik Amerıka men Eýropadan eshqandaı qurama shyǵa alǵan joq. Olar irikteý kezeńin qarasha aıynda aıaqtaıdy.
Álem chempıonatynda alǵash ret 48 qurama synǵa túsedi.
Eske salsaq, 4 qyrkúıekte Qazaqstan quramasy óz alańynda Ýelsten 0:1 esebimen jeńilip qaldy.