Fýtboldan ÁCh: Kim toptan súrinbeı shyǵady? - bizdiń boljam
Toptyq kezeń
A toby. Brazılııa, Horvatııa, Meksıka, Kamerýn. Alǵashqy topta Chempıonatty uıymdastyrýshy el ári álemniń bes dúrkin chempıondary Brazılııa quramasyna Horvatııa, Meksıka jáne Kamerýn qarsylas atanbaq. Bul toptyń serkesi sózsiz alań qojaıyndary bolýy tıis. Jalpy, Neımar bastaǵan «pentakampeondarǵa» aýyr júk artylyp otyr, sebebi áleýmettik narazylyq jaılaǵan Brazılııa halqyna tek kýbok qajet. Basqa nátıje olardy qanaǵattandyrmaıdy. Sondyqtan Lýıs Felıpe Skoları shákirtterine baryn salý qajet. Bir qyzyǵy, bul joly Brazılııa quramyndaǵy basty juldyzdar qorǵanys shebinde jınalǵan. Tıago Sılva, Davıd Lýıs pen Dante, Marselo men Danı Alvesh sekildi tasqamal qorǵaýshylardyń qarsylasty Jýlıo Sezardyń qaqpasynyń mańaıyna jolatpaýǵa shamalary keledi. Búkil eldiń úkilegen úmitine aınalyp otyrǵan Neımar úshin bul erekshe syn. Birinshi oryndy alań ıeleri eshkimge bere qoımas dep otyr mamandar. Al ekinshi oryn jáne 1/8 fınalǵa joldama úshin kúresti qalǵan úshi qurama júrgizetin bolady. Bul rette Balqan túbeginen kelgen aıaqdopshylar men meksıkalyqtardyń múmkindikteri sál basymyraq kórinedi. Bizdiń boljam: Birinshi oryn Brazılııaǵa buıyrady, ekinshi oryn úshin kúres Horvatııa men Meksıka arasynda ótedi. Quramy jaǵynan horvattardyń múmkindikteri joǵaryraq kórinedi.
V toby. Ispanııa, Gollandııa, Chılı, Avstralııa. 2010 jyly Ońtústik Afrıka Respýblıkasynda ótken sońǵy Álem birinshiliginiń fınalynda Ispanııa men Gollandııa quramalary oınaǵany belgili. Bul joly azýly qarsylastar toptyq týrnırde jolyǵyp otyr. Sondaı-aq bul topta Chılı men Avstralııa da óner kórsetedi. Kórshi topta Brazılııa, sondyqtan da barlyǵy tek birinshi oryn úshin aıqasatyny aıtpasa da túsinikti. Qazirgi Álem jáne Eýropa chempıondary Ispanııa osy joly da jetistigin qaıtalaı ala ma? Tórt jyl buryn jasyndaı jarqyldap, altyndy ápergen Kasılıas, Havı, Inestalar orda buzar shaqtan asyp barady. Al jas oıynshylar qurama tizginin óz qoldaryna alýǵa ázirge asyǵar emes. Al Gollandııa she? Robben, Sneıder, Van Persı sekildi jaryq juldyzdarmen birge Brazılııa alańynda negizinen jas oıynshylar dop tebedi. Jalpy Lýı Van Gal shákirtteri Mýndıaldaǵy eń jas qurama. Chılı alǵashqy kezdesýinde jeńiske jetip jatsa, alyptarmen básekelese alady. Al avstralııalyqtardyń toptan shyǵatynyna mamandar da, býkmekerler de senbeıtin sekildi. Bizdiń boljam: Ispanııa men Gollandııa alǵashqy eki oryndy ıelenip, kelesi kezeńge ótýleri tıis.
S toby. Kolýmbııa, Kot d`Ivýar, Grekııa, Japonııa. Bul toptan kim shyǵatynyn boljaý ońaı emes. Drogba men ıAıa Týre sekildi jaryq juldyzdar úshin qurama sapynda jetistikke jetýdiń sońǵy múmkindigi bolyp qalýy yqtımal, sondyqtan «Pil súıegi jaǵalýynan» kelgen fýtbolshylar aıanyp qalmasy anyq. Kolýmbııanyń basty juldyzy Radamel Falkao jaraqatyna baılanysty álemdik dodaǵa qatysa almaıdy, alaıda bul quramada onsyz da Eýropa alańdarynda dop teýip júrgender jeterlik. Al Kúnshyǵys eliniń ókilderi men ellınder qashanda eńbekqorlyǵymen, temirdeı tártibimen tanylyp keledi. Sol sebepti bul toptaǵy ár oıyn tartysty bolaryn ǵana boljaýǵa bolady. Bizdiń boljam: Tórt komandanyń da toptan shyǵýǵa múmkindikteri salystyrmaly túrde shamalas desek bolady. Kolýmbııa men Kot d`Ivýardyń quramy jaqsy bolsa, grekter men japondyqtardyń joǵary deńgeıli týrnırlerde sátti óner kórsetý tájirıbeleri mol.
D toby. Ýrýgvaı, Italııa, Anglııa, Kosta Rıka. Bul topta ár jyldary álem chempıony ataǵyn jeńip alǵan úsh birdeı komanda kelesi kezeń joldamasyn sarapqa salmaq. Ýrýgvaıdyń shabýyl shebi myqty. Lýıs Sýares pen Edınson Kavanı jubyn tusap ustap turý úshin qorǵaýshylarǵa talaı ter tógý qajet bolady. Berik qorǵanysqa ıek artatyn ıtalıandyqtar men áý basta fýtboldy oılap tapqan aǵylshyndar kez kelgen iri týrnırlerdiń favorıttteri qatarynda bolatyny túsinikti. Biraq osy joly qos quramanyń problemalary uqsas sekildi. Eki komandanyń jetekshi oıynshylary - Italııadaǵy Býffon men Pırlo da, Anglııadaǵy Djerrard pen Lempard ta fýtboldyq ólshemmen alǵanda aqsaqal jasyna jetti. Jańa kóshbasshylar Marıo Balotellı men Ýeın Rýnı sheshýshi sátte bosańdyq tanytyp júr. Biraq toptan shyǵa alsa, úsh komandanyń qaısysy da alysqa jetýi múmkin. Al Kosta Rıka úshin upaı úlestirýshi atanbaı, jaqsy oıyn órnegin kórsetse jaman nátıje bolmaıdy. Bizdiń boljam: Bul topta da básekelestik joǵary deńgeıde bolady dep kútilýde. Alaıda iri týrnırlerde óner kórsetý jaǵynan tájirıbeleri mol Italııa men Anglııa dittegen maqsattaryna jetýdiń jolyn biledi.
E toby. Frantsııa, Shveıtsarııa, Ekvador. Gondýras. Úshjolaqtylar úshin jerebe joldas boldy deýshiler kóp boldy. Shynynda da eger frantsýzdar alańda bar kúshterin sarpyp oınaıtyn bolsa, keminde shırek fınalǵa jetýge jol ashyq. Bir ókinishtisi, Frantsııanyń alańdaǵy úzdik oıynshysy Frank Rıberı jaraqatyna baılanysty Mýndıaldan tys qaldy. Sondaı-aq olarǵa shveıtsarııalyqtar men ońtústikamerıkalyqtar básekeles atanýy ǵajap emes. Bizdiń boljam: Frantsııa birinshi oryndy ıelenýi yqtımal, ekinshi oryn úshin talasta shveıtsarııalyqtar Ekvadordan aılasyn asyrýy ábden múmkin.
F toby. Argentına, Nıgerııa, Bosnııa jáne Gertsogovına, Iran. Lıonel Messı klýbtyq deńgeıde múmkin bolatyn barlyq kýboktardy utyp aldy. Endi Maradonamen bir qatarda atalý úshin jetispeı turǵan jalǵyz trofeı - Álem kýbogy. Brazılııa alańdarynda Messıge Anhel Dı Marııa, Serhıo Agýero, Gonsalo Igýaın sekildi álemdik fýtboldyń jaryq juldyzdary kómektespek. Alaıda Argentınanyń osal tusy da bar: qorǵanys shebinde asa tájirıbeli oıynshylardyń azdyǵy sheshimin tabýǵa bolatyn másele desek, qaqpashy pozıtsııasy jankúıerlerdiń erekshe alańdaýshylyǵyn týdyryp otyr. Qalǵan komandalar úshin toptyq týrnırden asý jetistikke balanady. Bizdiń boljam: Eger bul topta Argentına birinshi oryn almasa, úlken «sensatsııa» oryn alatyny sózsiz. Ekinshi oryn úshin talasty Nıgerııa men týrnırge alǵash qatysyp otyrǵan Bosnııa júrgizetin sekildi.
G toby. Germanııa, Portýgalııa, Gana, AQSh. Kez kelgen jarystyń basty favorıtteriniń biri atanatyn nemister sońǵy jyldary bıikti baǵyndyrýǵa bir-eki qadam qalǵanda súrinip júr. Ioahım Lev shákirtteri osy joly Jıýl Rıme kýbogyn Berlınge jetkizýge táýekel etip otyr. Bul maqsatqa qol jetkizý úshin Germanııada talaı týrnırdi baǵyndyrǵan tájirıbeli quram da, bilikti bapker de bar. Sondyqtan fınaldyq matchtan soń kýbokty Fılıp Lam kóterip jatsa, tań qalmańyz. Al Portýgalııa quramasy úshin Krıshtıaný Ronaldýdyń jaraqaty úlken problemaǵa aınalýy múmkin. Eger pıreneılikterdiń bas juldyzy toptyq týrnırde óner kórsete almasa, ganalyqtar men amerıkalyqtardyń pleı-off synyna shyǵý múmkindikteri arta túsetini anyq. Bizdiń boljam: Birinshi oryndy Germanııa ıelenedi, ekinshi oryn Portýgalııaǵa buıyrýy yqtımal.
N toby. Reseı, Belgııa, Ońtústik Koreıa, Aljır. Kóptegen mamandar bul topty eń «álsiz» dep sanaıdy. Tıbo Kýrtýa, Vensan Kompanı, Eden Azar, Romelý Lýkaký sekildi juldyzdardan quralǵan belgııalyqtardan jurt joǵary nátıje kútip otyr. Soltústik kórshilerimiz de Fabıo Kapellonyń tájirıbesine arqa súıep, keminde toptan shyǵady dep úmittenýde. On eki jyl buryn óz jerinde aıdy aspanǵa shyǵara jazdaǵan koreıalyqtardyń da, Mýndıalǵa qatarynan ekinshi ret kelip otyrǵan aljırlikterdiń de osal qarsylas emestigi árkimge aıan. Bizdiń boljam: Bul topta da qaǵaz júzinde eýropalyq komandalar favorıt sanalady. Belgııa men Reseıdiń alǵashqy eki oryndy ıelenýge múmkindikteri joǵary. Biraq Ońtústik Koreıany da esepten shyǵarýǵa bolmaıdy.
