«Fýkýsıma-1» atom stantsııasynda qoldanylǵan sý Tynyq muhıtyna tógile bastady

ASTANA. QazAqparat – Japonııanyń «Fýkýsıma-1» Atom-elektr stantsııasyndaǵy (AES) apattan 12 jyl ótkennen keıin Tokıo bıligi ıadrolyq reaktorlardy sýytý úshin paıdalanylǵan radıoaktıvti sýdy Tynyq muhıtyna tóge bastady, dep habarlaıdy QazAqparat Deusche Welle-ge silteme jasap.

2011 jyly Japonııada joıqyn zilzala bolyp, «Fýkýsıma-1» AES-te energııamen qamtý jáne sýyty júıesi isten shyqty. Saldarynan úsh reaktorda ıadrolyq otyn balqyp, artynan jarylys boldy, aýaǵa radıatsııa tarady. Aýqymdy terrıtorııalar zaqymdandy, olardan ondaǵan myń adam evakýatsııalandy.

Reaktorlardy sýytý úshin sý paıdanyldy. Keıin jınalyp qalǵan 1343 mln tekshe metr sýdy saqtaý qıynǵa soǵa bastady, rezervýarlar lyq tolǵan. 2021 jyldyń sáýirinde Japonııa úkimeti teńizge sýdyń aıtarlyqtaı kólemin tógýge ruqsat etti. Málimetterine súıensek, sý radıoaktıvti zattardan tazartylǵan. Degenmen, onyń quramynda sýteginiń radıoaktıvti ızotopy – trıtıı bar.

Japon bıligi sýdy Tynyq muhıtyna shaqyrymdyq týnnel arqyly aǵyzýdy kózdep otyr. Alǵashqy partııa retinde 17 kún ishinde muhıtqa 7800 tonna sý jiberiledi dep josparlanǵan. Mamandardyń pikirinshe, qaldyqtardy tastaý 30 jylǵa sozylady. Bul sýdy nelikten jerde saqtaýǵa bolmaıtyny týraly suraqqa japon bıligi naqty jaýap bergen joq.

Japonııanyń ıadrolyq retteý mekemesi, sonymen qatar Halyqaralyq atom energııasy agenttigi (MAGATE) sýdy Tynyq muhıtqa aǵyzý týraly jospardy maquldady.