Frontex: Eýropaǵa zańsyz ótýshiler sany kúrt tómendedi

ASTANA. KAZINFORM – Eýropalyq odaq mıgratsııalyq saıasatty qatańdatyp jatqan tusta, 2025 jyldyń alǵashqy úsh aıynda EO aýmaǵyna zańsyz kirý áreketteriniń sany ótken jyldyń sáıkes kezeńimen salystyrǵanda 34 myńǵa azaıǵan. Bul týraly Kazinform-nyń menshikti tilshisi habarlaıdy.

Eýroodaq shekarasyn qorǵaýǵa jaýapty Frontex agenttigi barlyq negizgi mıgratsııalyq baǵyttarda tómendeý baıqalǵanyn málimdedi. Agenttik ókilderiniń aıtýynsha, mıgratsııa máselesi Eýropalyq saıasattyń basty nazarynda qalyp otyr: Shengen aımaǵynyń ishki shekaralary jabylyp, Germanııadaǵy jańa koalıtsııalyq úkimet mıgratsııaǵa qatysty ustanymyn qataıtýda.

Frontex ókili Krıs Borovskı Politico basylymyna bergen suhbatynda: «Jyl basyndaǵy mundaı kúrt tómendeýdiń naqty sebebin aıtý qıyn. Degenmen, ótken jyldan bastalǵan tómendeý úrdisi jalǵasyp jatyr», — dedi.

Sońǵy aılarda EO mıgratsııalyq talaptardy kúsheıtetinin eskertken bolatyn. Oǵan deportatsııalaý rásimin jeńildetý, odaq aýmaǵynan ketýden bas tartqan mıgranttarǵa qatań jaza qoldaný, sondaı-aq EO-dan tys elderde «qaıtarý ortalyqtaryn» qurý josparlary jatady.

Frontex deregi boıynsha, eń úlken tómendeý — 64% — Albanııa, Serbııa, Chernogorııa jáne Soltústik Makedonııa baǵytynda tirkelgen.

— Birqatar baǵyttarda kontrabandamen aınalysatyn uıymdasqan qylmystyq toptarǵa qarsy kúrestiń jáne Frontex-pen tyǵyz áriptestiktiń nátıjesin kórip otyrmyz, ásirese Balqanda, — dedi Borovskı.

Onyń aıtýynsha, Frontex endi úshinshi eldermen jasalǵan jańa kelisimder negizinde EO shekarasynan tys jerlerde de jumys isteı alady. Buǵan deıin agenttiktiń qyzmeti tek EO elderiniń shekaralarymen shektelgen edi.

Bıylǵy eń júktemeli mıgratsııalyq baǵyt — Grekııa, Kıpr jáne Bolgarııa arqyly ótken jol boldy. Degenmen, bul baǵytta da ótý áreketteri 29%-ǵa azaıǵan.

Aıta keteıik, mıgranttar úshin qurlyq jáne teńiz arqyly ótýler áli de qaýipti kúıinde qalyp otyr. Halyqaralyq mıgratsııa uıymynyń málimetinshe, 2025 jyldyń alǵashqy toqsanynda teńizde 385 adam qaza tapqan, al 2024 jyly bul kórsetkish 2300-ge jýyqtaǵan bolatyn.

Buǵan deıin Eýroodaq elderi kóshbasshylarynyń sammıtinde mıgratsııa men halyqaralyq daǵdarystar basty talqylaý taqyryptarynyń biri boldy.