Freddı Merkıýrıdiń Londondaǵy úıi satylymǵa shyqty
ASTANA. KAZINFORM — Aty ańyzǵa aınalǵan mýzykant Freddı Merkıýrıdiń úıi Garden Lodge elý jylǵa jýyq ýaqyt ishinde alǵash ret satylymǵa qoıyldy. Osy ýaqyt ishinde úıdiń quny shamamen 60 ese ósti, dep jazady Euronews.
Freddı Merkıýrı ómiriniń sońǵy on jylyn ótkizgen Londondaǵy záýlim úıi 45 jylǵa jýyq ýaqyttan beri alǵash ret satylymǵa shyqty. 1907 jyly salynǵan úıdiń sharshy metri men shemasy týraly málimetter «qupııalylyq maqsatynda» kópshilikke jarııalanbady.
Dál sol sebepti onyń satylatyny týraly habarlandyrý da ınternette jarııalanbady.
Garden Lodge saraıy bedeldi Kensıngton aımaǵynda ornalasqan jáne 30 mıllıon fýnt sterlıngke (38 mıllıon dollar) baǵalandy.
Merkıýrı úıdi 1980 jyly satyp alǵan. Ol jyljymaıtyn múlikti qolma-qol aqshaǵa alǵan. Záýlim úıdiń ol kezdegi baǵasy 500 myń fýnt sterlıngten asady.
«Men úıdi kóre sala oǵan ǵashyq boldym. Jarty saǵat ishinde úıdi satyp aldym», - degen edi Merkıýrı kózi tirisinde.
Mýzykant úıdi qalpyna keltirip, ony kóptegen óner týyndylarymen, sonyń ishinde Pıkasso, Dalı jáne Matıss kartınalarymen toltyrdy.
Bul úı ótken aıdyń sońynda satylymǵa qoıyldy. 1991 jyly Merkıýrı qaıtys bolǵannan keıin úı Merı Ostınge muraǵa qalǵan. Merkıýı Ostındi ómirinen artyq jaqsy kórgen.
Ótken jyldyń sońynda 72 jastaǵy Ostın mýzykanttyń 1500 jeke zattary toptamasyn aýktsıonǵa qoıyp, keıin eki balasymen 30 jyldan astam turǵan úıin satýǵa sheshim qabyldady.
Olardyń ákesi sýretshi jáne kásipker Pırs Kemeronmen Ostın 1990 jyldan 1993 jylǵa deıin resmı nekede bolǵan.
«Bul úı ádemi estelik qazynasyna aınaldy, óıtkeni árbir bólme mahabbat pen jylýǵa toly, - dedi Ostın. - Munda ómir súrý — ǵanıbet. Jáne kóptegen jyly estelikter qaldy. Endi ol bos, men ony alǵash kórgen sátke oraldym. Freddı ekeýmiz aty ańyzǵa aınalǵan jasyl esikten ótken sátten bastap bul jer beıbitshilik mekeni, naǵyz sýretshiniń úıi boldy. Endi sol tynyshtyq sezimin kelesi adamǵa tapsyratyn kez keldi».
Kóptegen jazýlar men syzbalar salynǵan, saraıdyń aınalasyndaǵy baqshany qorshap turǵan kirpish qabyrǵadaǵy esik ótken jyly Sotheby's aýktsıonynda 524 000 dollarǵa satyldy.
Freddı Merkıýrı 1991 jyly 45 jasynda pnevmonııadan qaıtys bolǵan.
