Frantsııada zeınetkerlik jas 64-ke deıin kóterilmeıdi
ASTANA. KAZINFORM — Frantsııa parlamentiniń tómengi palatasy — Ulttyq jınalys zeınetaqy reformasyn toqtata turý týraly daýys berdi. Osylaısha, premer-mınıstr Sebasten Lekornıýdiń úkimeti senimsizdik votýmyn boldyrmaý úshin oppozıtsııanyń sharttaryn oryndady, dep habarlaıdy DW aqparat agenttigi.
Depýtattar qabyldaǵan túzetý Frantsııadaǵy zeınetkerlik jas prezıdent Emmanıýel Makron josparlaǵandaı 64 jasqa deıin kóterilmeı, 2027 jylǵy prezıdent saılaýyna deıin 62 jyl toǵyz aı deńgeıinde qalatynyn bildiredi.
— Úsh jarym mıllıon frantsýz halqy erterek zeınetke shyǵa alady, — dep málimdedi sotsıalıst depýtat Melanı Tomın.
Úkimettiń pikirinshe, bul bıýdjetke 2026 jyly 400 mln eýroǵa deıin, al 2027 jyly 1,8 mlrd eýroǵa deıin shyǵyn ákeledi. Parlament músheleri endi zeınetaqy reformasyn toqtatýdy qarjylandyrý úshin jalpy áleýmettik jarnany (CSG) arttyrý máselesin talqylaýy kerek. Budan basqa, bul sheshimdi endi Frantsııa parlamentiniń joǵarǵy palatasy — Senat ta maquldaýy tıis.
Premer-mınıstr Lekornıý sotsıalısterdiń talaptaryn qanaǵattandyrdy
Frantsııa premer-mınıstri Sebasten Lekornıý Makron ony premer-mınıstr etip qaıta taǵaıyndaǵannan keıin 14 qazanda Ulttyq jınalysqa zeınetaqy reformasyn toqtata turýdy usyndy. Bul toqtatý sotsıalısterdiń negizgi talaptarynyń biri boldy, olardyń daýystary Lekornıý úshin senimsizdik votýmyn bildirýden boldyrmaý jáne 2026 jylǵy bıýdjetti ilgeriletý úshin qajet edi, al onyń aldynda premer-mınıstr Fransýa Baırý bul jetistikke jete almady.
Frantsııadaǵy daýly zeınetaqy reformasy
Emmanıýel Makron zeınetaqy jasyn 62-den 64-ke deıin kóterý týraly zańǵa 2023 jyldyń sáýirinde qol qoıdy. Frantsııa prezıdenti bul qadamdy zeınetaqy qoryndaǵy aıtarlyqtaı tapshylyqpen túsindirdi. Zań bul ózgeristi parlamentte talqylaýsyz nemese daýys berýsiz qabyldaýǵa múmkindik beretin Konstıtýtsııanyń 49.3-babyna sáıkes qabyldandy,
Saýalnamalarǵa sáıkes, Frantsııa azamattarynyń kópshiligi reformany qabyldaǵan joq. Makron tıisti zańǵa qol qoıǵannan keıin búkil elde jappaı narazylyq bastaldy.
Parlamentti aınalyp ótetin zańdardy qabyldaý úshin 49.3-bapty paıdalanýdy toqtatý sotsıalısterdiń Lekornıýge qoıǵan ekinshi sharty boldy. Ol ony da oryndaýǵa ýáde berdi.
Buǵan deıin Frantsııada myńdaǵan adam bıýdjetti únemdeý sharalaryna qarsy shyqqanyn jazǵan edik.
Sondaı-aq Makron Sebasten Lekornıýdi Frantsııanyń premer-mınıstri etip qaıta taǵaıyndaǵanyn jazdyq.