Frantsııada ólim alǵash ret turǵyndar ósiminiń kórsetkishinen asyp tústi

ASTANA. KAZINFORM – 2025 jyly Frantsııada Ekinshi dúnıejúzilik soǵystan keıin ólim-jitim, týý kórsetkishinen alǵash ret asyp tústi, dep habarlaıdy Kazinform agenttiginiń menshikti tilshisi.

Le Monde basylymynyń INSEE Ulttyq statıstıka ınstıtýtynyń málimetterine silteme jasap habarlaýynsha, 2025 jyly Frantsııada 651 myń adam ólimi tirkelip, 645 myń adam dúnıege kelgen. Týý kórsetkishi COVID-19 pandemııasynan keıin kúrt tómendegen. Aıyrmashylyq 6 myń adam. Bul Eýroodaqtaǵy halyq sany turaqty ósip otyrǵan Frantsııa úshin alańdatarlyq jaǵdaı.

Halyqtyń qartaıýy men bala týý deńgeıiniń tómendeýi Frantsııanyń da demografııalyq daǵdarystan tys qalmaǵanyn kórsetedi. Bul úrdis búginde búkil Eýropada memlekettik qarjyǵa salmaq salyp otyr.

INSEE ortalyǵynyń málimetinshe, ótken jyly bir áıelge shaqqandaǵy týý kórsetkishi 1,56 balaǵa deıin tómendegen. Bul — Birinshi dúnıejúzilik soǵystan bergi eń tómen deńgeı jáne zeınetaqy qorynyń konsýltatıvtik keńesi boljaǵan 1,8 kórsetkishten áldeqaıda tómen.

Eýroodaq boıynsha salystyrmaly derekter bar keıingi 2023 jyly Frantsııa týý koeffıtsıenti 1,65-pen ekinshi orynǵa shyqqan. Bul kórsetkish boıynsha ol tek Bolgarııaǵa (1,81) ǵana jol bergen.

Týý ólimnen az bolǵanymen, Frantsııa halqy ótken jyly 69,1 mıllıon adamǵa deıin azdap ósti. Buǵan INSEE 176 myń adam dep baǵalaǵan taza kóshi-qon áser etti.

Cercle d’Epargne saraptamalyq ortalyǵynyń ekonomısi Fılıpp Kreveldiń aıtýynsha, 1960-jyldary týǵan aýqymdy býynnyń jappaı zeınetke shyǵýy eńbek naryǵyndaǵy qysymdy kúsheıtip, jumys kúshi tapshylyǵyn aldaǵy jyldary odan ári ýshyqtyrýy múmkin.

Qysqasy, demografııa — Frantsııa úshin jaı statıstıka emes, erteńgi ekonomıkanyń, áleýmettik turaqtylyqtyń sheshýshi faktory bolyp otyr.

Osyǵan deıin Italııadaǵy demografııalyq daǵdarys týraly jazdyq.