Frantsııada 2025 jyldyń alǵashqy ystyq tolqyny tirkeldi
ASTANA. KAZINFORM – Aldaǵy kúnderi Frantsııanyń úlken bóliginde temperatýra rekordtyq kórsetkishke jetip, 38°C deıin kóteriledi dep kútiledi, dep jazdy Kazinform agenttiginiń tilshisi.
Jergilikti meteorologtardyń aıtýynsha, bul — bıylǵy jazdaǵy erekshe kúshti ystyq kezeń, ol Eýropadaǵy jahandyq jylynýdyń naqty kórinisi bolýy yqtımal.
Dástúrli «Fête de la Musique» mýzyka merekesi senbi, 21 maýsymda ótedi jáne bul kúni óte ystyq bolady dep boljanǵan. Osylaısha, frantsýzdar osy maýsymdaǵy alǵashqy ekstremaldy ystyq tolqynymen betpe-bet kelmekshi.
— 19 maýsym, beısenbiden bastap birneshe kún boıy joǵary bolyp turǵan aýa temperatýrasy birtindep ósip, senbide sharyqtaý shegine jetedi, — deıdi Météo France. — Eń aldymen eldiń batys bóligi zardap shegedi, munda temperatýra 34-ten 38°C deıin kóteriledi. Túnder de ystyq bolady, tropıkalyq túnder bolýy múmkin, ıaǵnı temperatýra 20°C-tan tómen túspeıdi.
Météo-France juma kúni úshin Bretan men Overn-Rona-Alp aımaqtaryn qosa alǵanda, 16 departamentte qyzǵylt sary deńgeıdegi dabyl jarııalady. Ispanııa men Ulybrıtanııa da bul ystyqtan zardap shegýi múmkin.
Bul ystyq tolqyny — birneshe kún qatarynan qalyptan tys joǵary temperatýra saqtalatyn qubylys — 1947 jyldan beri Frantsııada tirkelip otyrǵan elýinshi jaǵdaı bolyp otyr.
— Bul jańa shyndyqtyń kórinisi sekildi: ystyq tolqyndary jıilenip, qarqyny kúsheıip, jyl basynda da, sońynda da paıda bolyp jatyr, — deıdi frantsýz klımatology.
— Buryn mundaı jaǵdaı bes jylda bir ret bolatyn dep esepteletin. Endi bul jyl saıyn, tipti odan da jıi bolyp jatyr.
1989 jylǵa deıin Frantsııada jyl saıyn orta eseppen 1,7 kún ǵana qatty ystyq kúnder tirkelse, 2000–2015 jyldar aralyǵynda bul kórsetkish segiz kúnge jetti. Sońǵy on jylda bul ortasha eseppen jylyna 9,4 kúnge deıin ósti.
Ǵalymdar únemi eskertip keledi: klımattyń ózgerýi aptap ystyq, qurǵaqshylyq jáne sý tasqyny sııaqty ekstremaldy aýa raıy qubylystarynyń jıileýine jáne kúsheıýine alyp keledi.
2024 jyly Frantsııadaǵy ystyq kezeńder týraly tolyǵyraq aqparatty myna jerden oqı alasyz.
Eske sala ketıik, buǵan deıin Ózbekstanda aptap ystyqqa baılanysty poıyzdar endi baıaý júretinin jazǵan edik.